कर्णालीमा लक्षणसहितका संक्रमित बढ्दै, १८ जना आईसीयूमा

सुर्खेत– कर्णाली प्रदेशमा आज ५२ जना कोरोना संक्रमित थपिएका छन्। संक्रमितमध्ये सुर्खेतका ३४, कालिकोटका चार, दैलेखका तीन, जुम्लाका दुई, डोल्पा र जाजरकोटका एकएक तथा अन्य प्रदेशका चार जना छन्। 

प्रदेश अस्पताल पशुपन्छी रोग अन्वेषण प्रयोगशाला सुर्खेतमा ५१ जना र नेपालगन्ज मेडिकल कलेज कोहलपुरमा एक जनामा संक्रमण पुष्टि भएको सामाजिक विकास मन्त्रालयले जनाएको छ। 

योसँगै कर्णालीमा कुल संक्रमितको संख्या तीन हजार चार सय ९४ जना पुगेको छ। त्यस्तै आज कर्णालीका विभिन्न अस्पताल र आइसोलेसनबाट गरी ६३ जना डिस्चार्ज भएका छन्। हालसम्म डिस्चार्ज हुनेको संख्या दुई हजार ९०५ पुगेको छ।

पछिल्लो समय कर्णालीमा जटिल प्रकृतिका संक्रमितको संख्या बढ्दै गएको छ।  प्रदेशमा हाल १८ जना जटिल प्रकृतिका संक्रमित आईसीयूमा उपचाररत छन्। 

१८ जना नै प्रदेश अस्पताल सुर्खेतको आईसीयूमा छन्। प्रदेश अस्पताल सुर्खेतका कोरोना फोकलपर्सन डा. नवराज केसीका अनुसार संक्रमितमध्ये तीन जनाको अवस्था गम्भीर छ। उनीहरु दीर्घरोगी र पाका उमेरका हुन्। 

यसअघि प्रदेश अस्पतालको आईसीयूमा राखिएका ४० जना उपचारपछि फर्किएका छन्। ‘लकडाउन खुकुलो भएसँगै जटिल प्रकृतिका संक्रमित बढेका छन्’, डा. केसीले भने, ‘अझै तीन महिनासम्म संक्रमणको दर उच्च हुनेछ।’ 

दसै‌ंतिहारमा संक्रमित क्षेत्रबाट आउनेको संख्या बढ्दा संक्रमणको दर उच्च हुने उनको भनाइ छ।

कर्णाली प्रदेशका अन्य जिल्लाको तुलनामा सुर्खेतमा संक्रमितको दर उच्च छ। चहलपहल बढी हुने भएका कारण वीरेन्द्रनगरमा संक्रमणको दर उच्च रहेको हो।

वीरेन्द्रनगरमा संक्रमितको संख्या बढ्दै गएपछि प्रदेश अस्पतालको आइसोलेसन कक्षसमेत भरिन थालेको छ। डा. केसीका अनुसार हाल प्रदेश अस्पतालको आइसोलेसनमा ५० भन्दा बढी संक्रमित छन्।

संक्रमित बढ्दै गएपछि लक्षण भएकालाई मात्रै अस्पतालको आइसोलेसनमा राख्ने गरिएको छ। लक्षणविहीन संक्रमित भने होम आइसोलेसन र होटल आइसोलेसनमा बसेका छन्। सुर्खेतको तुलनामा अन्य जिल्लामा भने संक्रमितको संख्या न्यून छ। 

कुनै बेला कोरोनाको हटस्पट मानिने दैलेखमा हाल २१ जना मात्रै सक्रिय संक्रमित छन्। त्यहाँ हालसम्म कसैलाई पनि आईसीयूमा राख्नुपर्ने अवस्था नआएको दैलेखका कोरोना फोकल पर्सन थिरप्रसाद रेग्मीले बताए।

कहाँ छन् पाँच सय सक्रिय संक्रमित?

कर्णाली प्रदेशभर हाल झन्डै पाँच सय अर्थात् चार सय ५६ जना संक्रिय संक्रमित छन्। संक्रमितमध्ये आधा संक्रमित होम आइसोलेसनमा छन्। 

कर्णाली प्रदेश सामाजिक विकास मन्त्रालयका अनुसार सुर्खेतका कुल तीन सय ३० जना सक्रिय संक्रमितमध्ये दुई सय तीनजना होम आइसोलेसनमा बसेका छन्।

सुर्खेतका सक्रिय संक्रमितमध्ये प्रदेश अस्पतालमा ६२ जना, वीरेन्द्रनगर होम आइसोलेसनमा दुई सय चार जना, वीरेन्द्रनगर आइसोलेसनमा १६, वीरेन्द्रनगर होटल आइसोलेसनमा १२, भेरीगंगा आइसोलेसनमा एक जना, गुर्भाकोट आइसोलेसनमा २० जना, बराहताल होम आइसोलेसनमा एक जना र वीरेन्द्रनगर सशस्त्र प्रहरी गण आइसोलेसनमा १७ जना छन्।

दैलेखका २१ जना संक्रिय संक्रमितमध्ये दैलेख अस्पतालको आइसोलेसनमा चार, चामुण्डा आइसोलेसनमा पाँच, आठबीस आइसोलेसनमा आठ र ठाँकीकाँध आइसोलेसनमा चार जना छन्। 

जाजरकोटको नलगाड आइसोलेसनमा ६, सल्यानको सल्यान क्याम्पसको आइसोलेसनमा २३, बनगाड कुपिन्डे आइसोलेसनमा ४८, छत्रेश्वरी आइसोलेसनमा दुई र कपुरकोट आइसोलेसनमा एकजना संक्रिय संक्रमित छन्। 

रुकुमपश्चिमका २१ जना संक्रमितमध्ये चौरजहारी अस्पतालमा ११ जना, सानीभेरी आइसोलेसनमा पाँचजना, मुसिकोट आइसोलेसनमा एकजना, त्रिवेणी गाउँपालिकामा होम आइसोलेसनमा चार जना र डोल्पाको त्रिपुरासुन्दरी आइसोलेसनमामा एकजना संक्रिय संक्रमित रहेको मन्त्रालयले जनाएको छ। कर्णाली प्रदेशका जुम्ला, हुम्ला र कालिकोट जिल्लामा भने सक्रिय संक्रमितको संख्या शून्य छ। 

७४ हजारको पीसीआर परीक्षण
कर्णाली प्रदेशमा हालसम्म ७४ हजारभन्दा बढीको पीसीआर परीक्षण गरिएको छ। वैशाख २० गतेदेखि पीसीआर परीक्षण सुरु भएको कर्णालीमा आइतबारसम्म ७४ हजार एक सय ३७ जनाको पीसीआर परीक्षण गरेको जनाएको हो। 

सामाजिक विकास मन्त्रालयको तथ्यांकअनुसार सुर्खेतमा सबैभन्दा धेरै पीसीआर परीक्षण गरिएको छ। सुर्खेतस्थित प्रदेश अस्पताल तथा पशुपन्छी रोग अन्वेषण प्रयोगशालामा ३६ हजार सात सय ७० जनाको पीसीआर परीक्षण गरिएको हो। त्यस्तै प्रतिष्ठानमा २५ हजार पाँच सय ९० जनाको पीसीआर परीक्षण गरेको छ।

दैलेख अस्पताल दैलेखमा चार हजार सात सय ७५ जना र रुकुम पश्चिमको चौरजहारी नगरपालिकाको पीसीआर प्रयोगशालामा सात हजार दुई जनाको पीसीआर परीक्षण गरिएको मन्त्रालयले जनाएको छ।