रानीगन्जमा तिनाउ नदी पस्यो

भैरहवा- अविरल वर्षाका कारण तिनाउ नदीमा पानीको बहाव बढेको छ। नदीको बहाव बढ्दा बस्तीमा समेत पानी पसेको छ।

बुटवल उपमहानगरपालिका वडा नं १७ रानीगञ्जमा रहेको प्रेम कुमारी खाम्चाको ४ कोठे घर नदीले बगाएको जिल्ला प्रहरी कार्यालय रुपन्देहीका प्रवक्ता डीएसपी खड्क बहादुर खत्रीले बताए। 

ब्लक जडान भएको र टिनले छाएको घर बगाएको प्रहरीको भनाइ छ। लत्ताकपडा अन्य सामानहरु बाढी पस्नुभन्दा अगावै निकालेका कारण क्षति हुन नपाएको प्रहरीले बताएको छ।

प्रहरीका अनुसार सोही स्थानका गणेश गैरे, तिलक गैरे र पुरुषोत्तम पुरीको घर बाढीको उच्च जोखिममा रहेकाले सामानहरु निकालिसकिएको छ।

उपमहानगरका प्रमुख शिवराज सुवेदीले नदी क्षेत्रको निरीक्षणसमेत गरेका छन्। प्रमुख सुवेदीले नेपाल समयसँग भने, 'नदी छेउको बाटो प्रभावित भएको छ। हामीले सबै जनतालाई सचेत हुन अपिल गरेका छौं।' बुटवलमा तिनाउको वारिपारि बाक्लो बस्ती छ।