सप्तरीमा मेयरलाई कोरोना संक्रमण, श्वासप्रश्वासमा समस्या भएपछि काठमाडौं लगिँदै

जनकपुरधाम– कोरोना संक्रमण पुष्टि भएका सप्तरीका एक मेयरको स्वास्थ्य बिग्रिएपछि काठमाडौं रिफर गरिएको छ। 

सप्तरीको हनुमाननगर कंकालिनी नगरपालिकाका प्रमुख शैलेशकुमार साहलाई मंगलबार कोरोना संक्रमण पुष्टि भएको थियो। त्यसपछि उनलाई जनकपुरस्थित कोभिड अस्पतालमा भर्ना गरिएको थियो।

साहमा श्वासप्रश्वासको समस्या देखिएपछि काठमाडौं रेफर गरिएको अस्पतालका फोकल पर्सन डा. रामदेव चौधरीले जानकारी दिए। उनका अनुसार नगर प्रमुख साहमा निमोनियाको समस्यासमेत देखिएको छ।

उनले भने ‘अहिले त नगर प्रमुख साहको अवस्था सामान्य छ तर भेन्टिलेटरको आवश्यकता पर्न सक्ने हुनाले काठमाडौं रेफर गर्न लागेका हौं।’ उनलाई काठमाडौं लैजानका लागि भेन्टिलेटर सहितको एम्बुलेन्स मगाउन लागिएको डा. चौधरीले बताए।  

नगर प्रमुख साह प्रदेश २ का सामाजिक विकास मन्त्री नवलकिशोर साहका छोरा हुन्। साहसँगै उनका ३२ वर्षीय चालकमा समेत कोरोना संक्रमण भएको छ।