बालबालिकाको मुन्द्रा लुटपाटमा संलग्न पक्राउ

काठमाडौं– बालबालिकाको कानमा लगाएको मुन्द्रा लुटपाट गर्ने कार्यमा संलग्न रहेको आरोपमा एक महिला पक्राउ परेकी छन्। 

सुनका गहना लुटपाट गरेको आरोपमा महानगरीय प्रहरी वृत्त बौद्धको टोलीले संगीता क्षेत्रीलाई गोकर्णेश्वर नगरपालिका–८ माकलबारीबाट  पक्राउ गरेको हो।

म्याग्दी घर भई काठमाडौंको बालाजुमा डेरा गरेर बस्ने ३२ वर्षीया क्षेत्री लामो समयदेखि बालबालिकाको कानमा लगाएको मुन्द्रा लुट्ने काममा सक्रिय रहेको प्रहरीले जनाएको छ। 

उनले बालबालिकालाई चकलेट/आइसक्रिम दिएर आमाको साथी भन्दै प्रलोभनमा पार्ने र नमानेमा डर देखाएर मुन्द्रा लुटपाट गर्दै आएको अनुसन्धानबाट खुलेको छ। 

महानगरीय प्रहरी परिसर काठमाडौंका अनुसार ती महिलाले अहिलेसम्म मनमैजु, कपन, कपुराधारा, गल्कोपाखा, स्युचाटार, कोटेश्वर, गोठाटार, महांकाल, बौद्धलगायतका २० ठाउँमा २२ बालबालिकाको मुन्द्रा लुटिसकेको  देखिएको छ। 

प्रहरीले लुटिएका सुनका मुन्द्रा/रिङ खरिद गर्ने व्यक्तिलाई पनि पक्राउ गरेको छ। पक्राउ पर्नेमा काभ्रे घर भई ललितपुरस्थित सौगलमा डेरा गरेर बस्ने ३० वर्षीय मुरली विक छन्।

उनले आफ्नै सुनचाँदी पसलमा लुटिएको सामान खरिद गर्ने गरेको खुलेको छ। उनले उक्त सुनपसल विना दर्ता नै सञ्चालन गर्दै आएको प्रहरीले जनाएको छ। 
उनको पसलबाट लुटिएका सुनका केही गहना, नगद साढे ३० हजारसमेत बरामद गरेको छ।