पर्वतको सहस्रधारामा पहिरो, सडक अवरुद्ध

पर्वत– मङ्गलबार साँझदेखि निरन्तर परेको वर्षाका कारण पहिरो जाँदा मध्यपहाडी लोकमार्गको पर्वत–बागलुङ सडकखण्ड अवरुद्ध भएको छ। 

पर्वतको कुस्मा नगरपालिका–१ सहस्रधारामा निरन्तर पहिरो झरेका कारण गए रातिदेखिनै सडक अवरुद्ध बनेको हो। 

दुई सातादेखि सो स्थानमा निरन्तर पहिरो झरिरहेकाले सामान्य वर्षा हुने वित्तिकै पनि पटकपटक सडक अवरुद्ध हुने गरेको छ। 

मंगलवार साँझदेखि यस क्षेत्रमा ठूलो वर्षा भइरहेको छ। 

वर्षा नरोकिँदा अवरुद्ध सडक खुलाउन समस्या भएको जिल्ला ट्राफिक प्रहरी कार्यालय पर्वतका प्रमुख कृष्ण खड्काले जानकारी दिए।

बाटो पुनः सञ्चालनमा ल्याउन स्काभेटर बोलाइएको र वर्षा रोकिए दिउँसोसम्ममा सडक सञ्चालन हुने उनले जानकारी दिए।  

सडक अवरुद्ध हुँदा साविक धौलागिरिका बागलुङ, म्याग्दी र मुस्ताङका लागि आएका सवारी साधनहरु नयाँपुलमा रोकिएका छन। 

ती जिल्लाबाट पोखरा, काठमाडौंका लागि छुटेका सवारी साधनहरु रातिदेखिनै मालढुंगामा अलपत्र बनेका छन्। 

अघिल्लो साताको आइतबारदेखि सो ठाउँमा निरन्तर पहिरो झरिरहेको थियो।