स्थानीयले दिए सशस्त्र प्रहरी गण स्थापनको सहमति

डोटी– जिल्लाको दिपायल सिलगढी नगरपालिका ४ जोगीडाब्रेमा सशस्त्र प्रहरी बलको ३६ नम्बर गण स्थापनाका लागि स्थानीयवासीले सहमति दिएका छन्। 

कुमालीकोट, राजपुर तथा कुल्पाते सामुदायिक वनमा निर्माण गरिन लागरेको गणको मुख्यालयका लागि सशस्त्र प्रहरीले वातावरणीय प्रभाव मुल्यांकन, क्षति तथा समस्याबारे राय सुझाव लिन कार्यक्रम गरेको थियो। 

कार्यक्रममा वडा नं ४ का स्थानीयवासी तथा सामुदायिक वनका पदाधिकारीले उक्त वन क्षेत्रमा भवन निर्माण गर्न सहमति दिएका हुन् ।

दुई वर्षअघि शिक्षक तालिम केन्द्रमा अस्थायीरूपमा स्थापना गरिएको सो गणका लागि अब आफ्नै जमिनसहित भवन निर्माणका लागि गृहमन्त्रालयबाट बजेट विनियोजन भएको छ। 

गणले यहाँका स्थानीयवासी तथा सरोकारवालासँग राय सुझाव लिन थालेको हो। 

सशस्त्र प्रहरीले गण स्थापना गरे वनसहित सबैलाई सुरक्षा मिल्ने भएकाले भवन निर्माण गर्न समुदायबाट नै सहमति दिने निर्णय गरिएको कुमालीकोट, राजपुर तथा कुल्पाते सामुदायिक वनका अध्यक्ष रतनबहादुर कठायतले बताए। 

सशस्त्र प्रहरी बलको गण स्थापना गरिए सामुदायिक वनमा चोरी सिकार र काठ चोरी रोकिने  तथा सबै नागरिकलाई सुरक्षा मिल्ने भएकाले सहमति दिएको उनको भनाइ छ।  

रासस