हुम्लाको लाप्चा भूमिमा चीनको दाबी, प्रमाण नभेटी फर्कियो अनुगमन टोली

सुर्खेत– हुम्लाको नाम्खा गाउँपालिका–६ मा पर्ने लाप्चा भूमि चीनले  दाबी गरेको छ। अनुगमनमा गएको नेपाली अधिकारीसँगका चिनियाँ पक्षले भूमि आफ्नो भएको दाबी गरेको हो। 

नेपाली भूमिमा चीनले एकतर्फी रुपमा भवन बनाएको खबरपछि हुम्लाका प्रमुख जिल्ला अधिकारी चिरञ्जीवी गिरीको नेतृत्वमा नेपाली टोली अनुगमनमा गएको थियो। 

चिनियाँ सेनाले लाप्चा क्षेत्र आफ्नो भएको दाबी गरेको नाम्खा गाउँपालिका अध्यक्ष विष्णु लामाले बताए। 

लामाका अनुसार चिनियाँ पक्षले लाप्चा क्षेत्रभन्दा एक किलोमिटर नेपालतर्फको भूमिसमेत आफ्नो भएको दाबी गरेको छ। 

उनले भने, ‘लाप्चामा चीनले भवन बनाएपछि अध्ययनका लागि सीडीओसहितको टोली गएका थियौं।  चिनियाँ पक्षले भवन बनेको क्षेत्र आफ्नो दाबी गर्‍यो।’ 

नेपाल–चीन सिमानामा पर्ने ११ नम्बर सीमास्तम्भ नभएका कारण लाप्चा क्षेत्र आफ्नो भन्ने दाबी गर्न नसकेको उनको भनाइ छ। 

टोलीले ११ नम्बरको पिल्लरसमेत फेला पार्न सकेको छैन।  यद्यपि चिनियाँ पक्षले भवन निर्माण गरेको लाप्चा क्षेत्र भने पहिलेदेखि नै नेपाले प्रयोग गर्दै आएका थियो। 

‘लाप्चा क्षेत्र पहिलेदेखि नै हामीले प्रयोग गर्दै आएका हौं। २०६६÷०६७ सालमा बाटोसमेत बनाएका छौं’, अध्यक्ष लामाले नेपाल समयसँग भने, ‘पहिले चीनले दाबी गरेको थिएन। भवन बनाएपछि त्यो क्षेत्र आफ्नो भएको दाबी गर्‍यो।’ 

अनुगमनका लागि गएको नेपाली टोलीलाई चिनियाँ पक्षले वार्ता गर्ने भए एक किलोमिटर नेपालतर्फ जान अनुरोध गरेको थियो।

‘चिनियाँ टोलीले यो हाम्रो भूमि हो, वार्ता गर्ने भए सिमानामा जाऔं भन्यो’, अध्यक्ष लामाले भने, ‘भूमि हाम्रो हो भन्ने प्रमाण नभेटिएपछि केही समयमै फर्कियौं।’

चीनले नेपाली भूमिमा भवन बनाउँदै गरेको जानकारी आएपछि टोली स्थलगत अनुगमनमा निस्किएको थियो। 

अनुगमन टोलीमा प्रमुख जिल्ला अधिकारी चिरञ्जीवी गिरी, नयाँ भैरवी दल गुल्मका गुल्मपति प्राज्ञ बस्नेत, सशस्त्र प्रहरी नायब निरीक्षक मोहन बस्नेत, राष्ट्रिय अनुसन्धानका डीएसपी सञ्जीव चौधरी र नाम्खा गाउँपालिकाका अध्यक्ष लामा थिए।

सम्बन्धित समाचार

चीनले सीमा मिचेर भवन निर्माण गरेको खबरपछि हुम्लाका सीडीओको टोली अनुगमनमा