नेकपाको सचिवालय बैठक आज पनि, मन्त्री हेरफेरको एजेन्डा प्राथमिकतामा

काठमाडौं- सत्तारुढ नेपाल कम्युनिष्ट पार्टी (नेकपा)को सचिवालय बैठक आज पनि बस्दै छ ।

पेरिसडाँडास्थित पूर्वमाओवादीको केन्द्रीय कार्यालयमा दिउसो १ बजे बस्ने बैठकमा मन्त्री हेरफेर र राजनीतिक नियुक्तिका विषयमा छलफल हुने भएको छ ।

आजको बैठकले हिजो (आइतबार) छलफल भएका तर निर्णय हुन नसकेका विषयमा निर्णय लिन सक्ने एक नेताले जानकारी दिए ।

हिजोको बैठकमा मन्त्रिपरिषद् पुनर्गठन, संवैधानिक तथा राजनीतिक नियुक्ति, सांगठनिक एकीकरणका बाँकी काम र केन्द्रीय कमिटी तथा स्थायी कमिटीमा पदपूर्ति गर्नेसहितका चार एजेन्डामा छलफलमा भएका थिए ।

चार एजेन्डामध्ये मन्त्री हेरफेरको विषयले हिजोको बैठकमा प्राथमिकता पाएको थियो । आजकाे बैठकमा पनि याे विषयले प्राथमिकता पाउने भएकाे छ ।

हिजाे मन्त्रिपरिषद् पुनर्गठनका लागि विभिन्न मापदण्डमाथि छलफल भए पनि मूर्त हुन बाँकी छ । हिजोको बैठकमा मन्त्री हेरफेरको तीन मोडलमा छलफल भएको थियो ।

पहिलो, प्रधानमन्त्रीबाहेक सबै मन्त्रीहरूको राजीनामा, दोस्रो, दुई वर्ष कार्यकाल पूरा गरेकाहरूको बिदाइ र तेस्रो, कार्यसम्पादन मूल्यांकनमा कमजोर रहेका मन्त्रीहरूलाई बिदाइ गरेर पुनर्गठन गर्नुपर्ने विकल्पमा केन्द्रित रहेर छलफल भएको एक नेताले बताए ।

सचिवालयको छलफलअनुसार कम्तीमा एक दर्जन मन्त्री फेरिन सक्ने नेताहरूको बुझाइ छ ।

मन्त्री हेरफेर गर्दा वरिष्ठ नेताहरु वामदेव गौतम र नारायणकाजी श्रेष्ठलाई पनि समेट्नु पर्नेमा अर्का अध्यक्ष प्रचण्डले जोड दिएका छन् । ओलीले यस विषयमा परामर्श गर्नुपर्ने बताएका छन् । आजको बैठकमा पनि यो विषयले प्राथमिकता पाउने भएको छ ।

यस्तै दोस्रो एजेन्डा राजनीतिक नियुक्तिबारे पनि आज छलफल हुनेछ । १३ संवैधानिक आयोगमध्ये विभिन्न ४१ पद रिक्त छन् ।