चितवनमा विभिन्न घटनामा तीन जनाको मृत्यु

चितवन– जिल्लाका विभिन्न घटनामा शनिबार तीन जनाको मृत्यु भएको छ ।

कोरोनाको सङ्क्रमण, सर्पको डसाइ र दुर्घटनामा परी तीन जनाको मृत्यु भएको हो ।

कोरोना संक्रमण भएर चितवन मेडिकल कलेजमा उपचारत एक महिलाको आज बिहान मृत्यु भएको हो ।

मृत्यु हुनेमा रौतहट चन्द्रपुर नगरपालिका ९ की ५१ वर्षीया महिला छिन् ।

कलेजका निर्देशक डा दयाराम लम्सालका अनुसार स्वासप्रस्वासमा समस्या आई भदौ २८ गते भर्ना भएकी उनमा २९ गते कोरोना सङ्क्रमण पुष्टि भएको थियो ।

कोभिड सघन उपचार कक्षमा उपचारका क्रममा उनकोे आज बिहान सवा ६ बजे मृत्यु भएको हो ।

यस्तै पिकअप भ्यानको ठक्करले एक जनाको मृत्यु भएको छ ।

भरतपुर महानगरपालिका ६ गीतानगरबाट सिताराम चोकतर्फ आइरहेको लु १ च ४४३५ नम्बरको भ्यानले प्रदेश २–०३–००६ प ७७६१ नम्बरको मोटर साइकललाई ठक्कर दिँदा मोटरसाइकल चालकको मृत्यु भएको हो ।

मृत्यु हुनेमा भरतपुर महानगरपालिका २३ का ३७ वर्षीय ज्योती दराई रहेको प्रहरीले जनाएको छ । उपचारका क्रममा आज बिहान भरतपुर अस्पतालमा दराईको मृत्यु भएको हो । ठक्कर दिने सवारी र चालक प्रहरीको नियन्त्रणमा रहेका छन् ।

यस्तै भरतपुरमै सर्पले डसेर एक जनाको मृत्यु भएको छ भने दुई जना उपचार गराइरहेका छन ।

मृत्यु हुनेमा भरतपुर महानगरपालिका १९ का २ वर्षीय रायन रामदाम रहेका छन् ।

जिल्ला प्रहरी कार्यालय चितवनका अनुसार उनलाई घरमा सुतिरहेको अवस्थामा विषालु सर्पले डसेको थियो ।

सर्पको डसाईपछि उनको उपचारका क्रममा चितवन मेडिकल कलेजमा मृत्यु भएको हो ।

यस्तै सर्पले डसेका मृतक बालकका हजुरआमा ५६ वर्षीया केशरी विक र आमा २३ वर्षीया रुवी सुनारको अवस्था गम्भीर छ ।

उनीहरुमध्ये विकको चितवन मेडिकल कलेज र सुनारको भरतपुर अस्पतालमा उपचार भइरहेको प्रहरीले जनाएको छ ।
-रासस