राष्ट्रपतिले भनिन् : संविधानको मर्मलाई व्यवहारमा रुपान्तरण गर्न इमानदार प्रयास जारी राखाैं

काठमाडौं–राष्ट्रपति विद्यादेवी भण्डारीले जनताका राजनीतिक अधिकार प्राप्तिका लागि गरिने संघर्षको चरण सम्पन्न भएको बताएकी छन्।

उनले अब मुलुकलाई सामाजिक न्यायसहितको आर्थिक समृद्धिको दिशातर्फ अघि बढाउनुपर्ने महान् दायित्व काँधमा आएको धारणा राखेकी हुन्।

संविधान दिवस तथा राष्ट्रिय दिवसका अवसरमा आज शुभकामना सन्देश दिँदै उनले भनेकी छन्, 'संविधान दिवसको यस दिनले समृद्ध नेपाल सुखी नेपालीको साझा राष्ट्रिय संकल्प हासिल गर्न सबै जनप्रतिनिधिमूलक संस्था, राजनीतिक दल तथा राज्यका सबै अंगलाई संवैधानिक मूल्य, मान्यता कार्यान्वयन गर्न प्रेरणा दिनेछ।'

संविधानको मर्म र भावनालाई व्यवहारमा रुपान्तरण गर्न मन, वचन र कर्मले समर्पित भई आआफ्नातर्फबाट इमानदार प्रयास जारी राख्न राष्ट्रपतिले सबैलाई आह्वान गरेकी छन्।

विश्वव्यापी महामारीका रुपमा फैलिएको कोरोना भाइरस रोकथाम, नियन्त्रण र उपचारका लागि नेपाल सरकारले चालिरहेका कदमको सराहनाका साथ त्यसमा चाँडो सफलता मिल्ने अपेक्षा सन्देशमा गरिएकाे छ।

राष्ट्रपतिकाे सन्देशमा विभिन्न आन्दोलनका क्रममा अमूल्य जीवन गुमाउने ज्ञातअज्ञात सहिदप्रति श्रद्धाञ्जलि अर्पण गर्दै मुलुकमा लोकतान्त्रिक शासन प्रणाली स्थापना गर्नका लागि भएका आन्दोलनको पथप्रदर्शन गर्ने अग्रजप्रति सम्मान एवम् श्रद्धासमेत व्यक्त गरिएकाे छ।