विराटनगर- विराटनगरका एक कोरोना संक्रमित वृद्धको आज (बिहीबार) साँझ मृत्यु भएको छ।
विराट शिक्षण अस्पताल, बुढीगंगाको आइसोलेसनमा उपचाररत विराटनगर-१० निलसदनका ६६ वर्षीय कोरोना संक्रमित वृद्धको बिहीबार साँझ सवा ५ बजे मृत्यु भएको हो।
मृत्यु भएको करिब १५ मिनेटपछि उनको कोरोना रिपोर्ट पोजेटिभ आएको अस्पतालका आइसोलेसन इन्चार्ज सुनिल देवले बताए। ज्वरो आउने र श्वासप्रश्वासमा समस्या देखिएपछि वृद्धलाई भदौ ३० गते उपचारका लागि अस्पताल ल्याइएको उनको भनाइ छ।
यसअघि कोशी अस्पतालको आइसोलेसनमा उपचारका क्रममा विराटनगर महानगरपालिका-६ का ६६ वर्षीय वृद्धको पनि बुधबार राति मृत्यु भएको थियो। उनको पनि मृत्युपछि बिहीबार बिहान कोरोना रिपोर्ट पोजेटिभ आएको थियो।
प्रदेश १ को राजधानी विराटनगर महानगरमा मात्रै हालसम्म २१ जना कोरोना संक्रमितको मृत्यु भइसकेको छ।
प्रकाशित: Sep 17, 2020| 20:10 बिहीबार, असोज १, २०७७
