मेयर शाक्यले सोल्टी होटेलमा गरेको खर्च विवरण सार्वजनिक गर्न माग

काठमाडौं– विवेकशील नेपाली दलले काठमाडौं महानगरपालिकाका प्रमुख विद्यासुन्दर शाक्यले सोल्टी होटेल (आइसोलेसन) मा बस्दा गरेको खर्च विवरण माग गरेको छ।
दलले पाँचतारे होटेलको आइसोलेसनमा शाक्यबाट भएको खर्च र महानगरले कोभिड–१९ रोकथामका लागि भएको खर्च विवरण मागेको हो।
गत स्थानीय तहको निर्वाचनमा काठमाडौं महानगर प्रमुखकी प्रत्यासी एवं दलकी नेतृ रञ्जु दर्शनाले सूचनाको हकबमोजिम निवेदन दर्ता गराएकी छन्।
दर्शनासँगै दलका संघीय समिति सदस्यहरू रजिया बानु र प्रमेश श्रेष्ठले शाक्यको सूचनाको हक सम्बन्धिको निवेदनमार्फत दर्ता गर्न महानगरपालिका कार्यालय पुगेका थिए।
दलका नेताले कोभिड संक्रमण नियन्त्रण गर्न असक्षम रहेको र पारदर्शिता कायम नभएको भन्दै असन्तुष्टि जनाएका छन् ।
नेतृ दर्शनाले भनिन्, ‘नागरिकको जिउधनको रक्षा गर्न असक्षम मात्र होइन् महानगरका गतिविधहरुमा पारदर्शिता कायम नभएकोमा समेत हामीले महानगरको ध्यानाकर्षण गरायौं।’