मन्त्री गुरुङले भनेः आर्थिक रूपले सवल नबनाई दलितमुक्ति सम्भव छैन

काठमाडौं– महिला, बालबालिका तथा ज्येष्ठ नागरिक मन्त्री पार्वत गुरुङले दलितमुक्ति आन्दोलन सफल बनाउन उनीहरुको आर्थिक सशक्तिकरण हुनुपर्ने बताएका छन ।

दलित सेवा संघको २६ औं स्थापना दिवसको अवसरमा आयोजित ‘भर्चुअल’ बैठकमा बोल्दै उनले दूर्गम क्षेत्रका अशिक्षित, गरिब दलितहरूलाई आर्थिक रूपले शसक्त नबनाई उनीहरूको मुक्ति सम्भव नहुने स्पष्ट पारे।

‘पिल्सिएर बसेका दलित, जनजाति, महिला समाजमाको मुक्तिका लागि आर्थिक सशक्तिकरणमा जोड दिनुको विकल्प छैन,’ उनले भने।

मुक्ति आन्दोलनलाई सफल बनाउन एकतावद्ध भएर अघि बढन पनि दलित समुदायका अगुवाहरूलाई उनले आग्रह गरे।

राजनीतिक परिवर्तन भयो तर अझै पनि सामाजिक रुपान्तरण किन भएन ? समाजमा विभेदहरूको अन्त्य किन भएन, सामाजिक कुरीति र अन्धविश्वासको किन अन्त्य भएन ? त्यसका कारणहरूको खोजी गरेर मात्रै दलितमुक्ति आन्दोलनलाई सफल बनाउन सकिने मन्त्री गुरुङको भनाइ छ।

उनले सामाजिक रुपान्तरणको माध्यामबाट ओझेलमा परेका दलितहरूको मुक्तिका लागि सरकार लागि परेको दावीसमेत गरे ।