हुम्लामा अज्ञात रोगका बिरामीको सङ्ख्या बढ्दै, स्वास्थ्य संस्थामा औषधि छैन

हुम्ला–जिल्लाको मध्ये क्षेत्रमा रहेको सर्केगाड गाउँपालिकाको उनापानी गाउँमा अज्ञात रोगका बिरामीको सङ्ख्या बढ्दै गएको छ ।

केही दिनयता ज्वरो आउने, खोकी लाग्ने, श्वास फेर्न गाह्रो हुने जस्ता लक्षणका बिरामीको सङ्ख्या बढ्दै गएको स्थानीय पुसे कार्कीले जानकारी दिएका छन ।

गाउँमा हरेक दिन बिरामीको सङ्ख्या बढ्दै गएको छ । अहिलेसम्म त्यस्तो लक्षणका बिरामीको संख्या करिब २० जना पुगको छ । उपचारका लागि स्थानीय आधारभूत स्वास्थ्य केन्द्रमा जाँदा औषधिको अभाव भएपछि थप समस्या भएको कार्कीले गुनासो गरे ।

गाउँपालिका र जिल्ला स्वास्थ्य कार्यालयबाट औषधि नगएपछि बिरामीलाई थप समस्या भएको हो । थप उपचारका लागि एक बिरामीलाई गत साता जिल्ला अस्पताल सिमकोट ल्याइएको भए पनि उनको ज्यान गएको थियो ।

त्यसले गाउँमा झन त्रास थपेको छ । स्थानीयवासीले स्वास्थ्यकर्मीको टोली खटाइ दिन सरकारसँग आग्रह गरेका छन् ।

ग्रामीण क्षेत्रमा रहेका स्वास्थ्य संस्थामा स्वास्थ्यकर्मीहरुले समन्वय नगरेका कारण औषधि भए नभएको थाहा नहुने स्वास्थ्य सेवा कार्यालय हुम्लाका प्रमुख प्रेम सिंहले बताए । उनापनीका बिरामी र स्वास्थ्य इकाइमा औषधिको अवस्था बुझेर आवश्यक कदम चाल्ने उनले बताए ।

सर्केगाड गाउँपालिका स्वास्थ्य शाखामा औषधि अभाव भएका कारण स्वास्थ्य संस्थाहरुमा समेत अभाव देखिएको संयोजक सन्तोष धामीले बताए ।

– रासस