काठमाडौं- निजी प्रयोगशाला सञ्चालकहरुले सरकारले तोकेको २ हजार रुपैयाँमा कोरोनाको पीसीआर परीक्षण गर्न नसक्ने जनाएका छन्।
मन्त्रालयले आइतबार सूचना जारी गर्दै निजी तथा सरकारी प्रयोगशालामा आरटी पीसीआर परीक्षण शुल्क ४ हजार ४ सयबाट घटाएर अधिकतम २ हजार रुपैयाँ तोकेको थियो।
मन्त्रालयले रिएजेन्ट तथा किटको मूल्य घटेको भन्दै २ हजार रुपैयाँमा पीसीआर परीक्षण गर्ने निर्णय गरेको थियो।
निजी प्रयोगशाला सञ्चालकले सोमबार स्वास्थ्य तथा जनसंख्या मन्त्रालयमा ज्ञापन पत्र बुझाउँदै २ हजारमा परीक्षण गर्न नसक्ने जनाएका छन्।
पीसीआर परीक्षणको लागि आवश्यक पर्ने रिएजेन्ट, किट, मेसिन, प्राविधिक व्यक्तिहरुको तलब, पीपीईलगायत अन्य आवश्यक सामग्रीको मूल्य २ हजारभन्दा बढी पर्न आउने भएकाले उक्त मूल्यमा परीक्षण गर्न नसक्ने निजी प्रयाेगशाला सञ्चालकहरुले बुझाएकाे ज्ञापन पत्रमा उल्लेख छ।
कोभिड- १९ को परीक्षण गर्ने उपत्यकामा १३ वटा निजी प्रयोगशाला सञ्चालकहरुले सोमबार स्वास्थ्य सचिव लक्ष्मण अर्याल, प्रमुख विशेषज्ञ डा. रोशन पोखरेल र कोभिड–१९ इन्सिडेन्ट कमाण्ड सिस्टम (आइसीएस) प्रमुख डा. गुणराज लोहनीलाई भेटेर नयाँ मूल्यमा सेवा दिन नसक्ने बताएका हुन्।
सरकारले भनेअनुसार २ हजारमा परीक्षण गरेर गुणस्तरीय र विश्वसनीय नतिजा दिन नसक्ने निजी प्रयोगशालाहरुको भनाइ छ।
प्रकाशित: Sep 14, 2020| 19:05 सोमबार, भदौ २९, २०७७
