सैनिक प्रवक्ता पौडेलको लेख सर्वोत्कृष्ट

काठमाडौं- नेपाली सेनाले प्रकाशित गर्ने सैनिक जर्नलमा प्रवक्ता सन्तोष बल्लभ पौडेलले लेखेको लेख सर्वोत्कृष्ट भएको छ।

सिपाही वार्षिक र शिवपुरी जर्नलमा प्रकाशित लेखहरुमध्ये २०७६ मा सहायक रथी पौडेलको लेख सर्वोत्कृष्ट बनेको हो।

उनले नगद ५० हजार पुरस्कार र कदर पत्र प्राप्त गरेका छन्। त्यस्तै दोस्रो प्रमुख सेनानी अनिलकुमार बुढाथोकी भएका छन्। तेस्रो प्रमुख सेनानी सुधिरप्रताप सिंह भएका छन्। उनीहरुले क्रमशः नगद ३५ हजार र २५ हजार पुरस्कार र कदर पत्र प्राप्त गरे।

प्रधानसेनापति महारथी पूर्णचन्द्र थापाले जङ्गी अड्डामा आयोजित कार्यक्रममा उत्कृष्ट लेखकहरुलाई पुरस्कार प्रदान गरे। यस्तै ७ जना लेखकहरुलाई सान्त्वना पुरस्कार स्वरुप जनही १० हजार र कदर पत्र प्रदान गरिएको छ।

लेख रचनाहरुको मुल्यांकन गर्ने सैनिक विज्ञ तथा सैनिकलाई समेत कदर पत्र प्रदान गरिएको छ।

नेपाली सेनाले रणनैतिक र सैनिक महत्वका विषयहरुमा लेख रचना लेख्न प्रेरित गर्दै प्रत्येक वर्ष प्रकाशन गरिने यी जर्नलहरुले अधिकृतहरुको वौद्धिक विकासका साथै नेपाली सेनाको संस्थागत विकासमा योगदान पुर्याउदै आएको नेपाली सेनाले जनाएको छ।