ओम्नी समूह कालोसूचीमा, एक वर्ष कुनै पनि खरिद प्रकृयामा भाग लिन नपाउने

काठमाडौं- स्वास्थ्य सामग्री खरिदमा विवादमा तानिएको ओम्नी विजनेश कर्पोरेट इन्टरनेशनल (ओवीसीआई) कालोसूचीमा परेको छ।

सोमबारदेखि लागू हुनेगरी सार्वजनिक खरिद अनुगमन कार्यालयले सोमबार नै सूचना प्रकाशित गरी एक वर्षसम्म अन्य खरिद प्रक्रियामा सहभागी हुन नपाउने गरी कालोसूचीमा राखेको हाे।

कार्यालयले स्वास्थ्य सेवा विभागको सिफारिसमा ओम्नीलाई कालोसूचीमा राखेको हो। स्वास्थ्य सेवा विभागले गत चैत १९ गते ओम्नीसँग भएको उपकरण खरिद सम्झौता रद्द गरेको थियो।

विभागले ओम्नीले स्वास्थ मन्त्रालयले बनाएको कोटेसनभन्दा २० प्रतिशत बढी मूल्यमा स्वास्थ्य सामग्री ल्याएको तथा सम्झौताअनुसार स्वास्थ्य उपकरण ल्याउन नसकेको भन्दै सम्झौता रद्द गरेको थियो।

कोरोना संक्रमण देखिएसँगै विभागले ओम्नी समूहसँग स्वास्थ उपकरण खरिदकाे सम्झौता गरेको थियो। तर विना प्रतिष्पर्धा महँगो मूल्यमा उपकरण ल्याउन लागेको भन्दै ओम्नी समूह र सरकारको आलोचना भएको थियो।

आलोचनाबाट बच्न स्वास्थ्य सेवा विभागले ओम्नीसँगको सम्झौता रद्द गरेको थियो। साथै ओम्नीलाई कालोसूचीबाट बचाउनका लागि विभिन्न राजनीतिक दलले चलखेल गरेको आरोप लागेको थियो।