श्रीमती हत्या गरेको आरोपमा २० वर्षपछि पक्राउ

काठमाडौं– श्रीमतीको हत्या आरोपीलाई प्रहरीले २० वर्षपछि पक्राउ गरेको छ । हत्या आरोपमा पक्राउ परेका दोलखाको भीमेश्वरस्थित ताथली घर भई काठमाडौँमा बस्दै आएका अरुणकुमार रिजाल (सुनार) पक्राउ परेका हुन ।

उनीमाथि कानुनी कारवाही अगाडि बढाइएको छ । उनीमाथि श्रीमती दिलमाया सुनारको विसं २०५७ सालमा हत्या गरेको आरोप छ । घटनापछि फरार भएका उनलाई पक्राउ गरी आइतबार जिल्ला अदालत काठमाडौंमा पेश गरिएको थियो । अदालतले पुर्पक्षका लागि थुनामा राख्न आदेश दिएको प्रहरी प्रधान कार्यालयले जनाएको छ ।

दिलमाया आफ्नै कोठामा मृतावस्थामा फेला परेकी थिइन् । तत्कालीन समयमा महानगरीय प्रहरी वृत्त कालिमाटीबाट अनुसन्धान गर्दा रिजालले नै घाँटी थिची कर्तव्य गरी मारेको खुल्न आएको थियो ।

त्यसयता उनी फरार थिए । उनलाई महानगरीय प्रहरी वृत्त कालीमाटीले पक्राउ गरी जिल्ला सरकारी वकिल कार्यालय बबरमहलमा बुझाएको थियो । उनलाई अहिले नक्खु कारागार ललितपुरमा राखिएको छ ।