एउटै गाउँका दुई कोरोना संक्रमितको रुपन्देहीमा मृत्यु

बुटवल- कपिलवस्तु शिवराज नगरपालिकाकाे एकै गाउँका दुई जना कोरोना संक्रमितको रुपन्देहीमा मृत्यु भएको छ।

शिवराज नगरपालिका ५ की ४७ वर्षीया महिलाको लुम्बिनी प्रादेशिक अस्पतालको कोरोना विशेष अस्पताल बुटवल मृत्यु भएको छ भने सोही ठाउँका ५८ वर्षीय पुरुषको भीम अस्पताल भैरहवामा मृत्यु भएको हो ।

उनीहरु एउटै वडाका भएपनि उनीहरुबीच नातासम्बन्ध भने नरहेको परिवारलाई उधृत गर्दै जिल्ला स्वास्थ्य कार्यालय कपिलवस्तुले जनाएको छ ।

भीम अस्पतालमा उपचार गराइरहेका पुरुष भदौ २३ गते अस्पताल भर्ना भएका थिए । कोरोना पुष्टि भएका उनको स्वास्थ्य गम्भीर बन्दै गएपछि आइसीयूमा राखेर उपचार गरिएको थियो । उनको आइतबार राति १०ः२६ बजे मृत्यु भएको भीम अस्पतालले जनाएको छ ।

यस्तै कपिलवस्तु शिवराज नगरपालिका वडा नं ५ की ४७ वर्षीया महिलाको भने सोमबार बिहान मृत्यु भएको अस्पतालले जनाएको छ । उनी भदौ २१ गते कोरोना संक्रमण पुष्टि भएपछि अस्पताल भर्ना भएकी थिइन् । दुवै मिर्गौलामा खराबी देखिएपछि उनी उपचार गराउँदै आएकी थिइन् ।

बुटवलको कोरोना विशेष अस्पतालमा सोमबारसम्म १७ जना आइसीयूमा र १ जनाको भेन्टिलेटरमा राखेर उपचार भइरहेको छ।