प्रधानमन्त्रीले भनेः बालबालिकाको संरक्षण उच्च प्राथमिकतामा

काठमाडौं– प्रधानमन्त्री केपी शर्मा ओलीले सरकारले बालबालिकाको हक र हितको संरक्षणलाई उच्च प्राथमिकतामा राखेको बताएका छन ।

राष्ट्रिय बाल दिवसका अवसरमा स्वदेश तथा विदेशमा रहेका नेपाली बालबालिका तथा अभिभावकलाई शुभकामना दिँदै प्रधानमन्त्रीले नेपालको संविधानमा मौलिक हकका रूपमा रहेको बालबालिकासम्बन्धी नीति तथा कानुन तर्जुमा गरी कार्यान्वयन गर्दै आएको जिकिर गरेका छन ।

‘बालबालिकामाथि हुने सबै किसिमका हिंसा, बेचबिखन तथा जघन्य घटनाका अपराधीहरूलाई कानूनी दायरामा ल्याई कडा सजाय दिने र बालबालिकालाई संरक्षण, सुरक्षा र अभिभावकत्व प्रदान गर्ने सरकारको प्रतिबद्धता छ’, प्रधानमन्त्रीद्वारा जारी शुभकामना सन्देशमा भनिएको छ ।

प्रधानमन्त्री ओलीले बालबालिकाको शारीरिक र मानसिक विकासका लागि सन्तुलित आहार, स्वच्छ उपयुक्त आवास, उपयुक्त प्रविधि प्रयोगसहितको शिक्षा, देशभक्ति, मानवता, सामाजिकता, उद्यमशीलता र रचनात्मकताको भावधारा जगाउने शिक्षादीक्षाको अधिकार सुनिश्चित गर्ने सरकारको नीति रहेको बताएका छन ।

सन्देशमा भनिएको छ, ‘बालबालिकाका लागि सुरम्य पारिवारिक–सामाजिक वातावरण निर्माण गर्न सङघीय सरकारको प्रयास मात्र पर्याप्त हुँदैन, त्यसका लागि सबै तहका सरकार, राष्ट्रसेवक कर्मचारी, राजनीतिक दल, नागरिक समाज, विकासका साझेदार, निजी क्षेत्र तथा सञ्चारकर्मी सबैको रचनात्मक सहभागिता तथा सहयोगको अपेक्षा गर्दछु ।’