सिन्धुपाल्चोकका लागि संघीय सरकारले विशेष योजना ल्याउनुपर्छ : सभामुख

काठमाडौं– सभामुख अग्निप्रसाद सापकोटाले सिन्धुपाल्चोकमा गइरहेको पहिरो सामान्य नभएको भन्दै संघीय सरकारले विशेष योजना ल्याउनुपर्ने बताएका छन्।

सिन्धुपाल्चोकको बाह्रबिसेमा हिजो मध्यरातमा गएको पहिरोको स्थलगत अध्ययन गर्न पुगेका सभामुख सापकोटाले आफू काठमाडौं गएर प्रधानमन्त्रीसहित सम्बद्ध निकायसँग छलफल गर्ने बताए।

‘संघीय सरकारको तर्फबाट अध्ययन गर्न विशेष टोली परिचालन गरेर फास्ट ट्रयाकमा काम गर्नुपर्ने देखिएको छ,’ उनले भने,‘सिन्धुपाल्चोक जिल्लाको एकीकृत योजना बनाएर काम गर्न आवश्यक भएको छ।’

सभामुख सापकोटाले सिन्धुपाल्चोकमा गइरहेको पहिरो सामान्य नभई गम्भीर असर गर्ने खालको भएको बताए।

‘आजसम्म देशैभरमध्ये यहाँ सबैभन्दा धेरै र ठूलो पहिरो गएको छ,’ उनले भने,‘उच्च सावधानीमा रहेर यहाँको दिर्घकालीन योजना बनाएर जानुपर्छ।’

पहिरोमा बेपत्ता भएकामध्ये ७ जनाको शव भेटिएको छ। पहिरोले १८ घर बगाउँदा अझै कम्तिमा २४ जना बेपत्ता भएको प्रहरीले जनाएको छ।

बाह्रबिसे नगरपालिका वडा नं ७ घुम्थाङको नागपुजेमा खसेको पहिरोले कम्तीमा ८ घर र भीरखर्कमा कम्तीमा १० घर पुरिएको प्रहरीले जनाएको छ।

यसअघि साउन ३० गते सिन्धुपाल्चोकको जुगल गाउँपालिका–२ लिदीमा खसेको पहिरोले १३ घर बगाउँदा २० जनाभन्दा बढिको मृत्यु भएको थियो।