कास्कीमा पर्सिदेखि सार्वजनिक यातायात चल्ने

पोखरा- कास्कीमा भाेलि भदौ २७ गते राति १२ बजेपछि निषेध आदेश सकिएसँगै पर्सिदेखि सार्वजनिक यातायात सञ्चालन हुने भएको छ।

जिल्ला प्रशासन कार्यलयले जारी गरेको पछिल्लो निषेध आदेश भोलि भदौ २७ गते राति १२ बजे सकिँदैछ। सीएमसीको शुक्रबार बसेको बैठकले जिल्लामा स्वास्थ्य र सुरक्षा मापदण्ड अपनाएर सार्वजनिक यातायात सञ्चालन गर्ने निर्णय गरेको छ।

सार्वजनिक यातायातमा चढ्ने यात्रुहरुले अनिवार्य मास्क लगाउनु पर्नेछ भने बसमा ढोकामा नै सेनिटाइजरको व्यवस्था गरिनुपर्नेछ।

यस्तै भौतिक दूरी कायम गरेर बसको एक लहरमा एक जना अर्थात् कुल सिटको आधा भन्दा नबढ्ने गरी यात्रु बस्ने व्यवस्था मिलाउनुपर्ने निर्णय वैठकले गरेको छ। सार्वजनिक यातायात बिहान ६ बजेदेखि राति ८ बजेसम्म सञ्चालन गर्न पाइनेछ।

निषेध आदेश खुलेपछि के गर्न पाइन्छ के पाइदैन ?

मानिसहरु भेला हुन, भिडभाड गर्न, जुलुस निकाल्न, जात्रा, महोत्सव, मेला गर्न तथा सबै धर्म संस्कृति, प्रचलन सम्बद्ध सामाजिक तथा सांस्कृतिक कार्य गर्न नपाइने छैन।

विद्यालय, क्याम्पस, सबै प्रकारका शैक्षिक संस्था, तालिम तथा प्रशिक्षण केन्द्र, सिनेमा हल, फुटसल, व्युटीपार्लर, जिमखाना, स्पा, सैलुन सञ्चालन वा खोल्न पाइने छैन।

स्वास्थ्य र सुरक्षा मापदण्ड अपनाएर निजि सवारीसाधन र ट्याक्सी बिहान ६ बजेदखि साँझ ८ बजेसम्म चलाउन पाइनेछ।