मालपोतका कर्मचारी सहित गण्डकीमा थप ४९ जनामा कोरोना पुष्टि

पोखरा- मालतपोतका कर्मचारी, स्वास्थ्यकर्मी, प्रहरी र जनप्रतिनिधिसहित गण्डकी प्रदेशमा थप ४९ जनामा कोरोना संक्रमण पुष्टि भएको छ।

सबैभन्दा धेरै सङ्क्रमित कास्कीको पोखरा महानगरपालिकामा १९ जना थपिएका छन् । त्यस्तै स्याङ्जामा १२ जनामा सङ्क्रमण पुष्टि भएको छ ।

यस्तै बाग्लुङका नौ जना, तनहुँमा तीन जना, नवलपरासी सुस्ता पूर्वमा पाँच जना र पर्वतमा एक जनामा संक्रमण पुष्टि भएको स्वास्थ्य निर्देशनालय पोखराले जनाएको छ ।

पोखरामा सङ्क्रमण पुष्टि भएकामध्ये एक जना पश्चिमाञ्चल सामुदायिक अस्पतालमा कार्यरत नर्स र पर्वतमा प्रहरीमा कार्यरत रहेको गण्डकी प्रदेशका स्वास्थ्य निर्देशक डाक्टर विनोदबिन्दु शर्माले जानकारी दिनुभयो ।

यसैगरी स्याङ्जाका सङ्क्रमितमध्ये ४ जना जिल्ला मालपोत कार्यालयका कर्मचारी र एक जना वडा सचिव हुन् ।

कोरोना सङ्क्रमित भएका जुवाडेहरुको कन्ट्याक ट्रेसिङ गर्दा मालपोतका कर्मचारीमा पनि संक्रमण देखिएको हो । उनीहरुलाई आइसोलेसनमा लाने तयारी भएको छ ।

योसँगै बिहीबार बिहानसम्म गण्डकी प्रदेशमा कोरोना सङ्क्रमितको संख्या दुई हजार सात सय २८ जना पुगेको छ ।

एक हजार आठ सय आठ जना निको भएका छन् ।