काठमाडौं- नेपाल आयल निगमले मोतीहारी–अमलेखगन्ज पेट्रोलियम पाइपलाइनमार्फत एक वर्षमा करीब ५३ करोड लिटर डिजेल आयात गरेको छ।
२०७६ भदौ २४ गते दक्षिण एसियाकै प्रथम अन्तरदेशीय पेट्रोलियम पाइपलाइनका रुपमा अमलेखगन्जमा पाइपलाइन सञ्चालनमा आएको एक वर्षका अवधिमा ५३ करोड ४१ लाख तीन हजार लिटर डिजेल आयात भएको छ।
पाइपलाइन सञ्चालनको एक वर्ष पूरा भएका अवसरमा आज एक प्रेस विज्ञप्ति जारी गर्दै निगमले प्रदेश नम्बर २ को अमलेखगन्जमा निरन्तर रुपमा डिजेल आयात भइरहेको जनाएको छ।
निगमका प्रवक्ता विनितमणि उपाध्यायका अनुसार ६९ किलोमिटर लामो उक्त पाइपलाइनमार्फत डिजेल आयात हुँदा ढुवानी भाडामा उल्लेख्य बचत भएको र पेट्रोलियम पर्दाथको गुणस्तर सुनिश्चित भएको छ।
उनका अनुसार भारतको बरौनीदेखि नेपालको अमलेखगन्जसम्म प्रतिलिटर ट्यांकर ढुवानीमा प्रतिलिटर एक रूपैयाँ ५० पैसा खर्च हुने गरेकामा पाइपलाइनपछि सो खर्च जोगिएको छ।
वर्षमा करीब रु ८० करोड २६ लाख ढुवानीमा रकम बचत भएको जनाइएको छ।
चालु आर्थिक वर्ष २०७७र०७८ को नीति तथा कार्यक्रमअनुसार मोतीहारी–अमलेखगन्ज पेट्रोलियम पाइपलाइनलाई चितवनको लोथरसम्म विस्तार गर्ने योजनाअनुसार काम अगाडि बढाइएको निगमले जनाएको छ।
प्रकाशित: Sep 09, 2020| 23:53 बुधबार, भदौ २४, २०७७
