उपत्यकामा भोलिदेखि यातायातमा जोरबिजोर, व्यापार व्यवसाय पनि खुल्ने

काठमाडौं– भदौ ३ गते मध्यरातदेखि काठमाडौं उपत्यकामा लगाइएको निषेध आदेश खुकुलो हुने भएको छ।

तीनवटै जिल्लाका प्रमुख जिल्ला अधिकारीको संयुक्त बैठकले निषेध आदेश खुकुलो बनाउने निर्णय गरेको हो।

गृह मन्त्रालयसँगको परामर्शपछि उपत्यकामा लगाइएको निषेध आदेश खुकुलो पार्ने निर्णय भएको एक प्रमुख जिल्ला अधिकारीले जानकारी दिए।

अब बिहीबारदेखि सार्वजनिक तथा निजी सवारी साधनहरुमा जोरबिजोर प्रणाली लागू गरिनेछ। व्यापार व्यवसाय पनि खुल्नेछन्। तर, आवश्यक सर्त भने लागू गर्नुपर्नेछ।

प्रशासनका अनुसार पार्टी प्यालेस, शैक्षिक संस्था, फिल्म हल, सभा, गोष्ठी, सेमिनारलगायतका सार्वजनिक कार्यक्रममा भने रोक लगाइएको छ। ललितपुरका प्रमुख जिल्ला अधिकारी नारायणप्रसाद भट्टले निर्णय केहीबेरमा सार्वजनिक गरिने जानकारी दिए।

उपत्यका प्रवेश गर्ने सवारीसाधनका हकमा भने यसअघिकै नियम लागू गरिनेछ। उपत्यकामा कोरोना भाइरसको संक्रमण बढेपछि भदौ ३ देखि लागू हुने गरेर तीन चरणमा निषेध आदेश जारी गरिएको थियो।

लामो समयसम्मको निषेध आदेशले जनजीवन कष्टकर बनेपछि सबै क्षेत्रको परामर्श र छलफलबाट उपत्यकाका तीनवटै जिल्ला प्रशासन कार्यालयले निषेध आदेश खुकुलो बनाउने निर्णय गरेका हुन्।