प्रदेश २ मा कोरोनाबाट मृत्यु हुनेको संख्या १०० पुग्यो

जनकपुरधाम- कोरोना संक्रमणका कारण प्रदेश २ मा मृत्यु हुनेको संख्या १०० पुगेको छ। प्रदेश २ मा कोरोनाबाट शनिबार थप २ जनाको भएसँगै कोरोना संक्रमणबाट मृत्यु हुनेको संख्या १०० पुगेको हो।

जबकी देशभरी कोरोना संक्रमणबाट मृत्यु हुनेको संख्या २८० छ। मृत्यु हुनेहरुमा अधिकांश वृद्ध तथा दीर्घ रोगी रहेको प्रदेश २ को सामाजिक विकास मन्त्रालयले जनाएको छ।

प्रदेशको पर्सा जिल्लामा २ कोरोना संक्रमितको मृत्यु भएको स्वास्थ्य निर्देशनालय प्रदेश २ का वरिष्ठ जनस्वास्थ्य प्रशासक विजय झाले जानकारी दिए।

पर्साको पकहा मैनपुर गाउँपालिका वडा २ का ७५ वर्षीय पुरुष र वीरगंज महानगरपालिका वडा १० आदर्शनगरका ७७ वर्षीय पुरुषको मृत्यु भएको झाले बताए।

कोरोना संक्रमणबाट सबैभन्दा बढी पर्सामा ३८ जनाको मृत्यु भएको छ। त्यस्तै बारामा १५, धनुषामा १२, महोत्तरीमा १०, सिरहा र सप्तरीमा ८/८, रौतहटमा ५, सर्लाहीमा ३ र एक भारतीय नागरिकको धनुषामै कोरोना संक्रमणबाट मृत्यु भएको छ।

प्रदेश २ मा हालसम्म कुल १ लाख ४ हजार ५८ जनाको स्वाब संकलन गरिएकोमा ११ हजार ६१ जनाको रिपोर्ट पोजेटिभ, ८८ हजार २५२ जनाको नेगेटिभ, १०० जनाको मृत्यु र ४ हजार ७४५ जनाको रिपोर्ट आउन बाँकी रहेको सामाजिक विकास मन्त्रालयले जनाएको छ।