बुटवलमा मिर्गौला रोगीको पीसीआर परीक्षण नि:शुल्क

भैरहवा- बुटवल उपमहानगरपालिकाले कोरोना महामारीका बेला मिर्गौलाका बिरामीलाई सहुलियत दिने भएको छ।

कोरोना महामारीका कारण मिर्गौला रोगीहरु तालिकाअनुसार अस्पतालमै गएर डायलासिस गराउनुपर्नेमा अधिकांश जान सकेको अवस्था छैन।

यस्तो अवस्थमा उपमहानगरले गम्भीर बिरामी रहेकाहरुको घरमै पुगेर कोरोना परिक्षणको लागि स्वाब संकलन गर्ने गरी तयारी थालेको छ।

जसमध्ये डायलासिस गराउनु पर्ने बिरामीहरुलाई प्राथमिकतामा राखिएको छ।

बुटवलमा स्थायी बसोबास गर्ने तथा उपचारका लागि बुटवलमै डेरा गरेर बस्दै आएका मिर्गौलाका सबै बिरामीहरुलाई कोभिडको सबै परीक्षण निशुल्क गर्न लागेको उपमहानगरका प्रमुख शिवराज सुवेदीले जानकारी दिए।

पायक पर्ने स्थानमा उपमहानगरका स्वास्थ्य प्राविधिक खटाएर स्वाब संकलन गरिने र उक्त स्थानसम्म पुग्नसमेत नसक्ने अवस्थाकालाई बसेको स्थानमै समेत पुगेर परीक्षण गर्नेगरी काम सुरु भएको प्रमुख सुवेदीले बताए।

उनले अस्पतालहरुमा डायलासिस गराइरहेका कागजातका आधारमा बसोबास गरेको वा डेरा गरेर बसेको वडा कार्यालयबाट सिफारिस बनाएर आउने यस्ता सबै बिरामीको निशुल्क परीक्षणको व्यवस्था मिलाइएको बताए।

पीसीआर परीक्षणका लागि सम्बन्धित वडा कार्यालयको सिफारिस ल्याउनुपर्ने छ। बुटवलले कोभिडजन्य कामका सिफारिसलाई समेत सहज र निःशुल्क बनाएको छ।

बुटवल र आसपासमा बसेर विभिन्न पाँच ठाउँमा डायलासिल गर्ने बिरामीको संख्या करिब ६ सय रहेको बताइएको छ।

बुटवल उपमहानगरले बन्दाबन्दीले आउजाउमा समस्यामा परेका दीर्घ रोगीलाई घरमै समेत पुगेर अत्यावश्यक औषधि वितरण, सुत्केरीलाई पोषणका आहार वितरण, अपांगता भएकालाई आवश्यक सामग्री वितरण गर्दै आएको छ।