रातो मच्छिन्द्रनाथको क्षमा पूजा गरियो, भोटो जात्रा नहुने

काठमाडौं– ललितपुरको पुल्चोकमा रातो मच्छिन्द्रनाथको क्षमा पूजा गरिएको छ।

कोरोना भाइरसको महामारीका कारण रथ जात्रा गर्न सम्भव नभएकोले आज क्षमा पुजा गरिएको हो।

क्षमा पूजा गरिएसँगै यो वर्ष रथ जात्रा नहुने भएको छ। मच्छिन्द्रनाथ जात्राका विधि प्रक्रिया भने हाल रथ भएको ठाउँ पुल्चोकमै गरिनेछ।

२६ गते साइत हेरेर रातो मच्छिन्द्रनाथलाई बुङ्मती प्रस्थान गराउने तयारी गरिएको छ।

यसअघिका वर्षमा रथ जात्रा पुल्चोकबाट गाःबहाल हुँदै मंगलबजार, पाटन–सुन्धारा, लगनखेल र अन्त्यमा जावलाखेलमा भोटो देखाएर सम्पन्न हुन्थ्यो। त्यसपछि बुङमती पुर्‍याउने गरिन्थ्यो।

बिहीबार निषेधाज्ञाकै बीच रथ तान्न सुरु गरेपछि प्रहरी र स्थानीयवासीबीच झडप भएको थियो। झडपपछि रथ यात्रा रोकिएको थियो।

बिहीबार बेलुका गुठीका सदस्य, ललितपुर महानगरपालिका र स्थानीय प्रशासनबीच यो वर्ष रथ जात्रा नगर्ने सहमति भएको थियो।