सन्दीप सम्मिलित जमैका तल्लावाजको अर्को हार

ट्रिनिडाड एण्ड टोबागो– नेपाली बलर सन्दीप लामिछानेको टिम जमैका तल्लावाजले क्यारेबियन प्रिमियर लिग (सीपीएल)मा चौथो हार बेहोरेको छ। मंगलबार राति सम्पन्न खेलमा तल्लावाज शीर्ष स्थानको ट्रिनबागो नाइट राइडर्ससँग १९ रनले पराजित भएको हो।

पहिलो इनिङमा ब्याटिङको निम्तो पाएको ट्रिनबागोले सम्पूर्ण ओभर खेलेर ४ विकेटको क्षतिमा १६४ रन बनायो। १६५ रनको लक्ष्य पछ्याएको तल्लावाज निर्धारित २० ओभरमा ६ विकेट गुमाउँदै १६५ मा समेटिएपछि उसले चौथो हार बेहोर्यो।

टस जितेर फिल्डिङ राजेको तल्लावाजका लागि नेपाली स्पिनर सन्दीपले ४ ओभर बलिङ गर्दै एक विकेट लिए भने कार्लोस ब्रेथवेटले २ विकेट लिए।

यता ब्याटिङ सम्हालेको ट्रिनबागोका कोलिन मुन्द्रोले १० चौका र एक छक्कासहित ६५ रन जोडे। साथै कप्तान टिम सेइफेर्टले अविजित ३३ रन बनाए, सुनिल नरिनले २९ रन बनाए भने लेन्डल सिम्मोन्सले २५ रनको योगदान दिए।

जवाफी ब्याटिङमा आएको तल्लावाजका आन्द्रे रुसेलले अविजित ५० रन बनाए भने ग्लेन फिलिप्सले ४१ रन बनाउँदा नक्रुमह बोन्नरले २६ रनको योगदान दिए। ट्रिनबागोका फवाल अहमदले २ विकेट लिए भने अकेल होसेँ, खरी पिएरा, नरिन र ड्बेन ब्राभोले समान १–१ विकेट लिए।

तल्लावाज सीपीएलमा ६ अंकका साथ तालिकाको चौथो स्थानमा छ। समान ६ अंक बनाएको गुयना अमेजन रन रेटका आधारमा माथि छ भने ट्रिनबागो र सेन्ट लुसिया क्रमशः १४ र १० अंकका साथ शीर्ष र दोस्रो स्थानमा छन्।

ट्रिनबागो नाइट राइडर्स सबै खेलमा अपराजित छ।