मोरङमा एक साता निषेध आदेश थपियो

विराटनगर–मोरङमा एक साताका लागि निषेध आदेश थप गरिएको छ । खुकुलो प्राबधानसहित एक साता निषेध आदेश लम्ब्याउने निर्णय गरिएको जिल्ला प्रशासन कार्यालय मोरङले जनाएको छ।

यसअघि दुई पटक थप हुँदै भदौ ५ गतेबाट जारी निषेध आदेश २२ गते राति १२ बजेसम्मका लागि लम्ब्याउने निर्णय भएको हो।

निषेध आदेश अवधिमा जोर गते जोर नम्बरका र बिजोर गते बिजोर नम्बरका निजी सवारीसाधन सञ्चालन गर्न पाइने भएको छ।

बजार तथा पसल अब चार बजेसम्म खुला हुनेछ। यसअघि दिनको १२ बजेसम्म मात्र बजार तथा पसल खुला गरिएको थियो। प्रशासनले शनिबार भने अत्यावश्यकबाहेकका पसल सञ्चालनमा रोक लगाएको छ।

सरकारी कार्यालयले आलोपालो गरी न्यूनतम संख्यामा कर्मचारी राखेर भदौ २१ गतेबाट तालिकाअनुसार सेवा सञ्चालन गर्नुपर्ने भएको छ।
उद्योगहरुले स्वास्थ्य सुरक्षा मापदण्ड पालना गरेर सञ्चालन गर्न पाउने भएका छन्।

जिल्लाभर राति ९ बजेदेखि बिहान ५ बजेसम्म हिँडडुल गर्न प्रतिबन्ध लगाइएको प्रमुख जिल्ला अधिकारी कोषहरि निरौलाले जानकारी दिए ।