उपत्यकाको निषेध आदेश खुकुलो पार्ने कि अझ कडा बनाउने ? निर्णय भोलिमात्रै

काठमाडौं– काठमाडौं उपत्यकाका तीन जिल्लाका प्रमुख जिल्ला अधिकारीहरुले जारी निषेध आदेशलाई थप कडा बनाउने वा खुकुलो पार्ने भन्ने दुई विकल्पमा आज मंगलबार छलफल गरेका छन्।

भर्चुअल बैठकमा तीनवटै जिल्लाका प्रमुख जिल्ला अधिकारीहरुबीच मुख्यतया यी दुई र अन्य विकल्पमा पनि छलफल भएको भक्तपुरकी प्रमुख जिल्ला अधिकारी हुमकला पाण्डेले जानकारी दिइन्।

‘हामीले विभिन्न विकल्पका बारेमा आज छलफल गरेका छौं, निर्णय केही गरिएको छैन,’ उनले भनिन्, ‘तीनवटै जिल्ला सुरक्षा समिति, जिल्ला कोभिड–१९ संकट व्यवस्थापन केन्द्रसहित छलफल गरेर गृहमा सिफारिस गरेर पठाइन्छ।’ गृह मन्त्रालयसँगको समन्वयपछि मात्रै भोलि बेलुकासम्ममा आवश्यक निर्णय हुने उनले जानकारी दिइन्।

उपत्यकाका तीनवटै जिल्लामा जारी दोस्रो चरणको निषेध आदेश भोलि मध्यराति १२ बजेबाट सकिँदैछ। तीनवटै जिल्लाका प्रमुख जिल्ला अधिकारीसहित सुरक्षा निकाय थप कडाइ गरेर जाने मनस्थितिमा छन्। तर, विभिन्न स्तरबाट निषेध आदेश लगाएर मात्रै नहुने भएकाले केही खुकुलो बनाउनुपर्ने पनि दबाब बढेकाले गृह मन्त्रालय भने केही खुकुलो बनाउनुपर्ने रणनीतिमा देखिएको छ।

उपत्यकामा दिनहुँ संक्रमित थपिने क्रम बढिरहेको छ। विज्ञहरु पनि निषेध आदेश लगाएर मानिसहरुलाई घरमा थुनेर मात्रै नहुने र परीक्षणको दायरा व्यापक बनाउनुपर्ने बताउँदै आइरहेका छन्। ३ भदौ मध्यराति १२ बजेदेखि उपत्यकाका तीनवटै जिल्लामा निषेध आदेश जारी भएको हो।