प्रदेश १ मा ५६ संक्रमित थपिए, ५४ डिस्चार्ज

विराटनगर- पछिल्लो २४ घण्टामा प्रदेश १ मा ५६ जना कोरोना संक्रमित थपिएका छन्। सुनसरीमा २६, मोरङमा १७, संखुवासभामा ९ र झापामा ४ जनामा संक्रमण देखिएको सामाजिक विकास मन्त्रालयले जनाएको छ।

सोमबार सुनसरीको धरानमा ६ महिला १४ पुरुष, कोशी गाउँपालिकामा ३ पुरुष, देवानगञ्ज र इनरुवामा १–१ पुरुष, इटहरीमा १ महिला, मोरङको विराटनगरमा ५ महिला ६ पुरुष, लेटाङमा १ महिला ४ पुरुष र बुढीगंगामा १ महिलाको रिपोर्ट पोजेटिभ आएको सामाजिक विकास मन्त्रालयले जनाएको छ।

मन्त्रालयका अनुसार संखुवासभाको खाँदबारीका १ महिला ८ पुरुष, झापाको कमल गाउँपालिकामा २ महिला २ पुरुषको रिपोर्ट पोजेटिभ आएको छ।

प्रदेश १ मा कोरोना संक्रमितको संख्या ३ हजार ३६७ पुगेको छ।

प्रदेश १ बाट सोमबार ५४ जना डिस्चार्ज भएका छन्। वी.जेनरल आइसोलेसन केन्द्र, हरिनगर सुनसरीबाट ३२, इलाम अस्पताल आइसोलेसन केन्द्र, इलामबाट १८ र होम आइसोलेसनबाट ४ जना डिस्चार्ज भएको सामाजिक विकास मन्त्रालयले जनाएको छ। हालसम्म १ हजार ५८९ जना कोरोनामुक्त भएका छन्।

प्रदेश १ मा सोमबार १ हजार ३९२ जनाको कोरोना परीक्षण गरिएएको छ। परीक्षण गरिएकामध्ये १७ महिला र ३९ पुरुषको रिपोर्ट पोजेटिभ आएको हो। प्रदेश १ मा हालसम्म ८८ हजार ९९० जनाको पीसीआर परीक्षण गरिएको मन्त्रालयले जनाएको छ।