कोरोनाबाट २४ घण्टामा कुन देशमा संक्रमित र मृत्यु कति ?

काठमाडौं- विश्वव्यापी महामारीको रुपमा फैलिएको कोरोना भाइरसबाट पछिल्लो २४ घण्टामा २ लाख ५३ हजार ९ सयभन्दा धेरै संक्रमित भएका छन् । ५ हजार २ सय ४८ जनाको मृत्यु भएको छ ।

संक्रमण र मृत्युदर सबैभन्दा धेरै भारतमा रहेको छ । पछिल्लो २४ घण्टामा भारतमा कोरोनाबाट ७८ हजार ४ सय ७२ जना संक्रमित भएका छन् । ९ सय ४४ जनाको मृत्यु भएको छ ।

भारतमा एकै दिनमा यति धेरै संक्रमित भएको यो पहिलो पटक हो । यसअघि बिहीबार र शुक्रबार ७६ हजारभन्दा धेरै कोरोनाबाट संक्रमित भएका थिए । पछिल्लो केहि दिन यता अमेरिका र ब्राजिलमा भन्दा धेरै संक्रमित भारतमा भेटिने गरेका छन् ।

यस्तै पछिल्लो २४ घण्टामा अमेरिकामा ४० हजार ७ सयभन्दा धेरै संक्रमित भएका छन् भने ९ सय २४ जनाको मृत्यु भएको छ । ब्राजिलमा थप ३४ हजार ३ सय ६० जनामा संक्रमण पुष्टि हुँदा ९ सय ४ जनाको मृत्यु भएको छ ।

त्यस्तै पेरुमा ९ हजार ४ सय ७४ जना संक्रमित थपिदा १ सय ३६ जनाको मृत्यु भएको छ । कोलम्बियामा थप ९ हजार ३ सय ९४ जना संक्रमित हुँदा २ सय ९७ को ज्यान गएको छ ।

कोरोनाबाट पछिल्लो २४ घण्टामा अर्जेन्टिनामा ९ हजार २ सय ३०, मेक्सिकोमा ५ हजार ८ सय २४, फ्रान्समा ५ हजार ४ सय ५३, रुसमा ४ हजार ९ सय ४१, इराकमा ३ हजार ८ सय ३४, फिलिपिन्समा ३ हजार ६ सय ३७ र इन्डोनेसियामा ३ हजार ३ सय ८ जना संक्रमित भएका छन् ।

नेपालमा भने पछिल्लो २४ घण्टामा ८ सय ८४ जना संक्रमित थपिदा १२ जनाको मृत्यु भएको छ । हालसम्म ३७ हजार ३ सय ४० जना संक्रमित भएका छन् भने २ सय ७ जनाको मृत्यु भएको छ ।

जोन हपकिन्स विश्वविद्यालयका अनुसार अहिलेसम्म कोरोनाबाट २ करोड ४८ लाख ९६ हजारभन्दा धेरै कोरोनाबाट संक्रमित भएका छन् भने ८ लाख ४० हजार ४ सय ७ जनाको मृत्यु भएको छ ।