बीपी स्वास्थ्य विज्ञान प्रतिष्ठानमा दुई जना कोरोना संक्रमितको मृत्यु

काठमाडौं- धरानस्थित बीपी कोइराला स्वास्थ्य विज्ञान प्रतिष्ठानमा उपचाररत दुईजना कोरोना संक्रमितको शुक्रबार बिहान मृत्यु भएको छ।

झापाको दमक नगरपालिका ३ का ८३ वर्षीय पुरुष र मोरंगको बेलबारी नगरपालिका ५ का ५६ वर्षीया महिलाको शुक्रबार बिहान मृत्यु भएको हो। झापाका ८३ वर्षीय पुरुषलाई बीएण्डसी अस्पताल झापाले रिफर गरेको थियो।

अत्यधिक खोकी, श्वास फेर्न समस्या, ज्वरो आएका उनलाई कोरोना संक्रमण पुष्टि भएपटि रिफर गरिएको थियो।

मृतक व्यक्तिमा मृगौलाको दिर्घकालीन समस्या भइ डायलासिस गर्नुपरेको, उच्च रक्तचाप, मधुमेह, अल्प रक्तकोशीका समस्या रहेको बुझिएको छ।

उनको शुक्रबार बिहान पौने चार बजे मृत्यु भएको अस्पतालका प्रवक्ता डा. निदेश सापकोटाले जानकारी दिए।

शवको व्यवस्थापन नियमानुसार गर्ने तयारी भइरहेको छ। यस्तै मोरंगकी ५६ वर्षीया महिलालाई कोशी अञ्चल अस्पतालले रिफर गरेको थियो।

उनमा पनि अत्यधिक खोकी, श्वास फेर्न समस्या, ज्वरो आएको र कोरोना संक्रमण पुष्टि भएपछि त्यहाँ ल्याइएको प्रतिष्ठानले जनाएको छ।

९ भदौमा संक्रमण पुष्टि भएपछि अस्पताल ल्याइएकी उनको पनि शुक्रबार बिहान सवा ३ बजे मृत्यु भएको हो।