८७ वर्ष कैद सजाय सुनाइएका सहित ४ जना कुख्यात डाका पक्राउ

काठमाडौं- कैलालीमा कुख्यात डाकाको समूहलाई प्रहरीले २० वर्षपछि पक्राउ गरेको छ।

पक्राउ परेका ४ जनामध्ये एक जना जिल्ला अदालतबाट ८७ वर्ष कैद सजाय तोकिएका व्यक्ति पनि छन्। कैलाली प्रहरीका अनुसार पक्राउ पर्नेमा कैलाली जोशीपुर घर भएका ४५ वर्षीय क्रमराज थापा उर्फ रोहगी, ४९ वर्षिय भगत चौधरी उर्फ रोहिना, ३८ वर्षीय गुन सिंह कठरिया उर्फ कालु र भजनी नगरपालिका–६ बस्ने ४७ वर्षीय टिकाराम चौधरी उर्फ डगौरा छन् ।

सो समूह एउटै डाँका समूह हो । एक जमानामा खुँखार डाँका कहलिएको थियो यो समूह। पक्राउ परेका मध्ये क्रमराज थापा उर्फ रोहगी र भगत चौधरी उर्फ रोहिनालाई प्रहरीले यसअघि पनि पक्राउ गरेर जेल पठाएको थियो।

उनीहरु ०६१ माघ २७ मा तत्कालिन बिद्रोही माओवादीले कैलाली कारागारमा आक्रमण गर्दा भागेका थिए। क्रमराज उर्फ रोहगी डाँकाका पनि महा डाँका हुन् । उनले २०७५ सालमा करिव दुई महिनाको अवधिमा जोशीपुर गाउँपालिकाका विभिन्न वडा र बर्दगोरिया गाउँपालिकामा ८ ठाउँमा डाँका चोरी गरेको प्रहरीको रेकडैमा छ।

०५७ सालमा सो क्षेत्रमा डकैती साम्राज्य खडा गरेका उनलाई जिल्ला अदालत कैलालीले ८७ वर्ष कैद सजाय हुने फैसला गरेको छ । भगतलाई ६ वर्ष कैद सजाय, गुनसिंहलाई ४ वटा डाका मुद्दामा ३९ वर्ष कैद सजाय सुनाइएको छ।

उनी सुरुदेखि नै फरार थिए। यस्तै टिकारामलाई ५ वटा डाका मुद्दामा ३८ वर्ष कैद सजायको फैसला सुनाइएको छ। उनी पनि सुरुदेखि नै फरार थिए।

जिल्ला प्रहरी कार्यालय कैलालीका प्रवक्ता डिएसपी प्रतिक बिष्टले उनीहरुलाई घरबाटै पक्राउ गरिएको जानकारी दिए। चारै जनालाई बिहीबार नै कैलाली जिल्ला अदालतमा पेश गरिएको प्रहरीले जनाएको छ।

उनीहरु ६,७ जनाको समूहमा भरुवा बन्दुक, खुकुरी बोकेर रातभर डाकागिरी गर्ने र दिनभर मोजमस्ति गर्थे।