गण्डकीमा तीन सुरक्षाकर्मीसहित थप २५ जनामा कोरोना संक्रमण

काठमाडौं- गण्डकी प्रदेशमा तीन सुरक्षाकर्मीसहित थप २५ जनामा कोरोना भाइरस संक्रमण भएको छ।

योसँगै प्रदेशमा कोरोना भाइरस संक्रमितको संख्या एक हजार ९७७ पुगेको प्रदेश स्वास्थ्य निर्देशनालयले जनाएको छ।

बाग्लुङमा नेपाल प्रहरीमा कार्यरत एक जना र लमजुङको बेसीसहरमा कार्यरत नेपाली सेनाका दुई जनामा कोरोना संक्रमण भएको हो।

आज संक्रमित थपिएकामा पर्वतका एक, बाग्लुङका आठ, लमजुङका चार, तनहुँका नौ र नवलपरासी पूर्वका तीन जना छन्।

प्रदेशमा निको हुनेको संख्या एक हजार ६६५ पुगेको छ। यो प्रदेशमा कुल संक्रमितको ८४.२१ प्रतिशत हो।

पोखरामा बुधबार ३२ वर्षीया एक महिलाको कोरोना संक्रमणबाट मृत्यु भएको छ।

पोखरा महानगरपालिका ११ की ती महिलाको पोखरा स्वास्थ्य विज्ञान प्रतिष्ठानमा उपचारका क्रममा निधन भएको प्रतिष्ठानका निर्देशक डा. अर्जुन आचार्यले बताए।

प्रदेशमा कोरोनाबाट मृत्यु हुनेको संख्या नौ पुगेको छ।