महाकाली नगरपालिकामा उच्च ज्वरोका कारण ४ जनाको मृत्यु

काठमाडौं– कञ्चनपुरको महाकाली नगरपालिकामा उच्च ज्वरोका कारण दुई सातायता ४ जनाको मृत्यु भएको छ।

महाकाली नगरपालिका क्षेत्रका विभिन्न वडाहरुमा उच्च ज्वरोका बिरामी देखिएका छन्।

प्राथमिक स्वास्थ्य केन्द्र दोधारा–चाँदनीका प्रमुख डा. गगन चौधरीले उच्च ज्वरोका कारण चार जनाको मृत्यु भएको जानकारी दिए।

‘दुई सातादेखि उच्च ज्वरोका बिरामी धेरै देखिएका छन्,’ उनले भने, ‘अहिलेसम्म उच्च ज्वरो र शरीरमा सेतो रक्तकोषको मात्रा अत्यधिक देखिएको छ।’ बिरामीहरुमा १०४ डिग्री फरेनहाइट भन्दा धेरै ज्वरो देखिएको छ।

उनले परीक्षण नगरेर मृत्यु के कारणले भयो भन्ने अहिले नै भन्न नसकिने बताए। स्वास्थ्यकर्मीहरुले म्यानेन्जाइटिस वा इन्सेफ्लाइटिसको आशंका गरेका छन्।

प्राथमिक स्वास्थ्य केन्द्रले नमुना संकलन गरेर परीक्षणका लागि पठाएको छ। उनीहरुमा कोरोना भाइरससँग मिल्दो अन्य कुनै लक्षण भने नदेखिएको स्वास्थ्य केन्द्रले जनाएको छ।

अहिले दैनिक आउने बिरामी मध्ये ५० प्रतिशत बिरामी उच्च ज्वरोकै समस्या भएका रहेको डाक्टर चौधरीले बताए। उनका अनुसार बुधवार मात्रै एकजना बिरामीलाई कैलालीको धनगढीस्थित सेती प्रादेशिक अस्पताल रिफर गरिएकोे छ। तीनजना उच्च ज्वरोका बिरामीहरुलाई स्वास्थ्य केन्द्रमै भर्ना गरिएको छ।