नेपालगञ्ज- कोरोना भाइरसको संक्रमणबाट बाँकेमा थप एक पुरुषको मृत्यु भएको छ ।
कोहलपुर मेडिकल कलेजमा उपचाररत नेपालगञ्ज उपमहानगरपालिका वडा नम्बर १ का ३७ वर्षीय पुरुषको मंगलबार राति मृत्यु भएको जिल्ला स्वास्थ्य कार्यालय, बाँकेले जनाएको छ ।
भदौ ८ गते नेपालगञ्ज मेडिकल कलेजमा भर्ना भएका उनको दुवै फोक्सोमा निमोनिया भएको थियो ।
भर्ना भएकै दिन उनको स्वाव लिइएको थियो । भोलिपल्ट ९ गते कोरोना पोजिटिभ रिपोर्ट आएको थियो।
मेडिकल कलेजमा उपचार रहेका उनका अवस्था बिग्रिँदै गएपछि नेपालगञ्जबाट भेन्टिलेटरसहित कोहलपुर मेडिकल कलेजमा सारेर उपचार थालिएको थियो । उपचारकै क्रममा मंगलबार राति मृत्यु भएको हो ।
योसँगै बाँकेमा कोरोनाबाट ज्यान गुमाउनेको संख्या पाँच पुगेको छ । यसअघि नरैनापुर, बैजनाथ, कोहलपुर र नेपालगञ्जकै एकएक जनाको कोरोनाबाट मृत्यु भइसकेको छ।
प्रकाशित: Aug 26, 2020| 07:22 बुधबार, भदौ १०, २०७७
