पत्रकार संक्रमित भएपछि रेडियो स्टेसन बन्यो आइसोलेसन

पर्सा- रेडियोमा कार्यरत सञ्चारकर्मीमा कोरोना भाइरस संक्रमण भएपछि यहाँको एउटा रेडियो स्टेसन आइसोलेसन केन्द्र बनेको छ। सञ्चारकर्मीले त्यहींबाट सूचना प्रवाह गरिरहेका छन्।

वीरगन्जको सामुदायिक रेडियो नारायणी एफएममा कार्यरत पाँच जना सञ्चारकर्मी आइतबार एकैपटक संक्रमित भएका थिए। तर उनीहरुले स्टेसन बन्द नगरी आफ्नो जिम्मेवारी पूरा गर्दै आएका छन्।

संक्रमित सञ्चारकर्मीको साहस देखाएर काममा निरन्तर जुटेपछि प्रसारण बन्द गर्नु नपरेको रेडियोका अध्यक्ष गोविन्द देवकोटाले बताए।

यसअघि स्टेसन प्रमुख क्रान्ति शाहसँगै तीनजना सञ्चारकर्मीमा कोरोना संक्रमण भएको थियो।

उनीहरु कोरोनामुक्त भई होम आइसोलेसनमा छन्।

थप पाँच जना सहकर्मी संक्रमित हुँदा रेडियो सञ्चालन गर्न सक्ने अवस्था नरहे पनि संक्रमित साथीहरूको सहमतिमा सूचना सम्प्रेषण गर्ने कामलाई निरन्तरता दिन सकिएको देवकाेटाले बताए।

उनले सहकर्मी साथीहरुले बरु रेडियो स्टेसनलाई नै आइसोलेसन बनाउने तर सूचना प्रवाहलाई निरन्तरता दिने निर्णयमा पुगेपछि प्रसारण बन्द नगरिएको बताए।

यस्तो जटिल परिस्थिति सामना गर्दै आइसोलेसनमा रहेका र होम क्वारेन्टिनमा रहेका साथीहरुले आफ्नो जिम्मेवारी पूरा गरिरहेको उनको भनाइ छ।

पर्सामा ३१ जना आईसीयूमा, थप ३३ जनामा कोरोना संक्रमण