पर्सामा ३१ जना आईसीयूमा, थप ३३ जनामा कोरोना संक्रमण

पर्सा- पर्सामा १० महिलासहित थप ३३ जनामा काेराेना संक्रमण भएकाे छ। योसँगै पर्सामा संक्रमितको संख्या एक हजार ९७९ पुगेको छ।

संक्रमित ३१ जना आईसीयूमा उपचाररत छन्।

पछिल्लोपटक चार सय ३४ जनाको पीसीआर परीक्षण गर्दा ३३ जनामा संक्रमण पुष्टि भएको हो।

संक्रमित हुनेमा कालिकामाइ गाउँपालिका ५ का ८ जना, वडा नम्बर २ का ४ जना, जगरनाथपुर गाउँपालिकाका ३ का २ जना तथा वडा नम्बर २,४,५,६ मा एकएकजना रहेको नारायणी अस्पतालका चिकित्सक डा. उदयनारायण सिंहले जानकारी दिए।

यसैगरी वीरगन्ज महानगरपालिका १२ का ३ जना, १४ का २ जना र वडा नम्बर ३, ४, ८, ९, १०, ११, १५, १६ र १७ का एकएकजना संक्रमित थपिएका हुन् ।

पर्सामा अहिलेसम्म १८ हजार ३ सय १४ जनाको पीसीआर परीक्षण भएको छ।

विभिन्न कारखानाका मजदुर तथा तथा डेरा मा बस्दै आएका २४ जना भारतीय नागरिक संक्रमित भएका छन्।

यस्तै १३० जना स्वास्थ्यकर्मी, ८७ जना सुरक्षाकर्मी, १३ जना पत्रकार, ९८ जना कैदी तथा थुनुवा, ४९ जना अस्पताल सरसफाइकर्मी, गार्ड तथा कार्यालय सहयोगी र तीन जना एम्बुलेन्स चालक संक्रमित छन्।

संक्रमितमध्ये २ सय ७७ महिलासहित ६ सय ४० जना होम आइसोलेसनमा छन्। ३७ महिलासहित एक सय ५ जना अस्थायी कोभिड अस्पताल गण्डक र वीरगन्ज हेल्थ केयरमा छन्।

यीमध्ये वीरगन्ज हेल्थ केयरमा २२ जना र गण्डक अस्पतालमा नौ गरी ३१ जना आईसीयूमा उपचाररत रहेको नारायणी कोभिड अस्पतालका अर्का चिकित्सक डा. निरज सिंहले बताए।

पर्सामा कोरोना संक्रमणबाट हालसम्म ३१ जनाको मृत्युु भएको छ।