वीपी स्वास्थ्य विज्ञान प्रतिष्ठानको क्षमता विस्तार गर्न मुख्यमन्त्री राईको निर्देशन

विराटनगर– प्रदेश १ का मुख्यमन्त्री शेरधन राईले कोरोना संक्रमितको संख्या बढेसँगै वीपी कोइराला स्वास्थ्य विज्ञान प्रतिष्ठानको क्षमता विस्तार गर्न निर्देशन दिएका छन्।

उनले ५ सय क्षमताको आइसोलेशन बेड र कोभिड अस्पताललाई २ सय बेड क्षमताको यथाशिघ्र तयार गर्न निर्देशन दिए।

वीपी कोइराला स्वास्थ्य विज्ञान प्रतिष्ठानको उपचारबारे जनस्तरबाट गुनासो आएपछि मुख्यमन्त्री राईले पदाधिकारीलाई मुख्यमन्त्री कार्यालय विराटनागरमा बोलाएर गुनासो नआउने गरी उपचारको प्रवन्ध मिलाउन पनि निर्देशन दिएका छन्। उनले कोरोना संक्रमित र अन्य विरामीलाई छुट्टा छुट्टै उपचारको प्रवन्ध मिलाउन निर्देशन दिए।

मुख्यमन्त्री राईले वीपीका पदाधिकारीहरु उपकुलपति ज्ञानेन्द्र गिरी, रेक्टर गुरु खनाल र रजिष्टार मोहन रेग्मीलाई आफ्नो कार्यकक्षमा बोलाएर निर्देशन दिएका हुन्। उनले विरामीहरुको राम्रो उपचार गराउन र आएका विरामीहरुलाई नफर्काउन समेत पदाधिकारीहरुलाई निर्देशन दिए।

तत्काल पीसीआर परीक्षणको दायरा बढाउन निर्देशन दिँदै आवश्यक समन्वय गर्नका लागि संयन्त्र निर्माण गर्न मुख्यमन्त्री राईले निर्देशन दिएका छन्। मुख्यमन्त्रीको निर्देशनसँगै वीपीका पदाधिकारीहरुले आवश्यक कामहरु थाल्ने जानकारी गराएका थिए।