एउटै वडाका थप ६ जनामा कोरोना पुष्टि

तनहुँ- तनहुँको भानु नगरपालिकाको एउटै वडामा मंगलबार थप ६ जनामा कोरोना संक्रमण पुष्टि भएको छ।

भानु नगरपालिका–१ मा थप ६ जनामा कोरोना संक्रमण पुष्टि भएको हो। तीमध्ये चार महिला र दुई पुरूष छन्।

उक्त वडाका ४६ र ६३ वर्षीय पुरूष तथा ४५, ५२, १७ र २५ वर्षीया महिलामा कोरोना संक्रमण पुष्टि भएको गण्डकी प्रदेश स्वास्थ्य निर्देशनालयले जनाएको छ।

थपिएका सबै समुदायका व्यक्ति हुन्। तनहुँमा हालसम्म भानु नगरपालिकामा सबभन्दा बढी समुदायका व्यक्तिमा कोरोना संक्रमण पुष्टि भएको छ।

भानु नगरपालिका–१ का ३४ वर्षीय एक पुरूषमा कोरोना संक्रमण देखिएपछि कन्ट्याक्ट ट्रेसिङबाट सोही वडाका २० जनामा संक्रमण पुष्टि भएको थियो। त्यसपछि प्रहरी, इन्जिनियर र वडाध्यक्षलाई समेत कोरोना संक्रमण पुष्टि भएको थियो।

आज थपिएका कोरोना संक्रमित सुरूमा पहिचान भएकाहरूकै नजिकका व्यक्ति रहेको भानु नगरपालिकाका स्वास्थ्य शाखा प्रमुख ऐश्वर्यचन्द्र भट्टराईले जानकारी दिए।

कन्ट्याक्ट ट्रेसिङबाट १ सय २७ जनाको स्वाब संकलन गरी परीक्षणका लागि पठाइएकोमा ६ जनामा कोरोना संक्रमण पुष्टि भएको उनले जानकारी दिए।

भानु नगरपालिकामा समुदायका व्यक्तिमा कोरोना फैलिएपछि जिल्ला प्रशासन कार्यालय तनहुँले भदौ १४ गतेसम्म निषेधाज्ञा जारी गरेको छ। -रासस