अस्पतालले शल्यक्रिया गर्न नमान्दा बिरामीको मृत्यु

बुटवल- लडेर गम्भीर घाइते भएका एक पुरुषको कोरोनाको बहानामा उपचार नहुँदा मृत्यु भएको छ ।

घरको छतबाट लडेर घाइते भएका रुपन्देही गैडहवा गाउँपालिका- ३ का ५५ वर्षीय पुरुषमा कोरोना संक्रमण पनि देखिएको थियो । कोरोना देखिएपछि अस्पतालले थप उपचार नगर्दा उनको मृत्यु भएको आफन्तको दाबी छ ।

लडेर घाइते भएपछि उनी युनिभर्सल मेडिकल कलेजमा भर्ना भएका थिए । जमेको रगत निकाल्न टाउकोको शल्यक्रिया गर्नुअघि उनको पीसीआर टेस्ट गरिएको थियो ।

पीसीआरमा कोरोना पोजिटिभ देखिएपछि उपचार गर्नुको साटो उनलाई त्यहाँबाट अन्यत्र लैजान युनिभर्सल मेडिकल कलेजले दबाब दिएको थियो । दबाबपछि उनलाई भीम अस्पतालमा भर्ना गरिएको परिवारका सदस्यले बताएका छन् ।

उनको भीम अस्पतालमा टाउकोको शल्यक्रिया नहुँदा मृत्यु भएको आफन्तले बताएका छन् । कोरोनाको बहानामा अन्य उपचार नगरिएकै कारण ज्यान गुमाउनु परेको भन्दै आफन्तले आक्रोश व्यक्त गरेका छन् ।