साढे ६ किलो अफिमसहित दुई पक्राउ

काठमाडौं– प्रतिबन्धित लागूपदार्थ अफिमसहित दुई जना पक्राउ परेका छन्।

उनीहरूलाई महानगरीय अपराध महाशाखाको टोलीले काठमाडौंको तारकेश्वर नगरपालिका लोलाङ हाइटबाट साढे ६ किलाेग्राम अफिमसहित पक्राउ गरेको हो।

महाशाखाका प्रमुख एसएसपी दीपक थापाका अनुसार पक्राउ पर्नेमा त्रिवेणी नगरपालिका–१ जाजरकोटका २२ वर्षीय दिलीप विश्वकर्मा र दोलखा भीमेश्वर नगरपालिका–६ की १८ वर्षीय प्रमिला राउत छन्।

उनीहरूले प्रहरीलाई बरामद अफिम जाजरकोटबाटै प्रतिकेजी एक लाख ५० हजारका दरले किनेर ल्याएको बयान दिएका छन्।

काठमाडौंमा ल्याएर आठ लाख प्रतिकिलोका दरले अफिम बिक्री गर्न लागिएको अवस्थामा पक्राउ गरिएको थापाले जानकारी दिए।

पक्राउ परेका विक मुख्य अभियुक्त रहेको र उनले कारोबारमा शंका हुने देखेर बच्न राउतलाई साथमा लिएको आशंका प्रहरीले गरेको छ।

राउतले विकलाई आफूले दाइ मानेर तिहारमा टीका लगाइदिने गरेको बताएकी छन्। प्रहरीले अफिम खरिद गर्न आउने गिरोहको खोजी भइरहेको जनाएको छ।