सञ्चारकर्मीको निःशुल्क पीसीआर परीक्षण गराउन महासंघको माग

काठमाडौं– नेपाल पत्रकार महाससंघले कार्यस्थलमा गएर समाचार संकलन गर्ने सञ्चारकर्मीको कोरोना भाइरस (कोभिड १९) को निःशुल्क सीीआर परीक्षणको व्यवस्था मिलाउन सरकारसँग आग्रह गरेको छ।

महासंघका महासचिव रमेश विष्टले विज्ञप्ति जारी गर्दै कोभिड १९ को संक्रमणको उच्च जोखिमका बीच कार्यस्थलमा खटिने सञ्चारकर्मीको निःशुल्क पीसीआर परीक्षणको व्यवस्था मिलाउन आग्रह गरेका हुन्।

महामारी संक्रमणबाट जोगिन आफ्नो स्वास्थ सुरक्षालाई उच्च प्राथमिकतामा राखेर मात्रै काम गर्न समेत महासंघले सबै सञ्चारकर्मीलाई अपिल गरेको छ।
सञ्चार प्रतिष्ठानले पनि अति आवश्यक बाहेक घरबाटै काम गर्ने व्यवस्था मिलाउन र कार्यालय तथा कार्यस्थलमा खटिने सञ्चारकर्मीका लागि स्वास्थ्य सामग्रीको प्रयोगसँगै पर्याप्त सचेतता अपनाउने वातावरण निर्माण गर्न महाससंघले आग्रह गरेको छ।

संक्रमणको दर वृद्धि भएसँगै पछिल्लो समयमा अग्रभागमा रहेर कार्य गरिरहेका सञ्चारकर्मीमा समेत कोरोना संक्रमण देखिने क्रम बढेको महासङ्घले जनाएको छ।
महासचिव विष्टका अनुसार हालसम्म कम्तीमा ३५ सञ्चारकर्मी संक्रमित भइसकेका छन्। ससंवादाता, फोटो पत्रकार र क्यामेरा पर्सन संक्रमणको जोखिममा छन्। रासस