काठमाडौंका प्रत्येक वडामा कोरोना संक्रमित, उपत्यकामा संक्रमितको संख्या ३२ सय नाघ्यो

काठमाडौं– कोरोना भाइरस काठमाडौंको प्रत्येक वडामा पुगेको छ । ३२ वटै वडामा कोरोना भाइरसको संक्रमण फेला परेको काठमाडौं महानगरपालिकाले जनाएको छ ।

सबैभन्दा धेरै संक्रमित वडा नम्बर ३२ को कोटेश्वर क्षेत्रमा भेटिएको छ । जहाँ १२३ जनामा संक्रमण पुष्टि भएको छ । सबै वडामा संक्रमित भेटिएसँगै सतर्कता अपनाउन महानगरले अपिल गरेको छ ।

पछिल्लो समय काठाडौं उपत्यकामा दिनहुँ करिब २ सय संक्रमित फेला पर्ने गरेको छ । आइबार १६६ जना संक्रमित थपिएका थिए भने शनिबार २१६, शुक्रबार १८२, बिहीबार २०० र बुधबार १५९ संक्रमित थपिएका थिए।

उपत्यकामा कोरोना संक्रमितको कुल संख्या ३ हजार २४२ पुगेको छ। यीमध्ये काठमाडौंका २ हजार ४९०, ललितपुरका ४२४ जना र भक्तपुरका २५० जना छन्।

नेपालमा अहिलेसम्म ६ लाख ४ सय ४४ जनाको पीसीआर परीक्षण गर्दा ३१ हजार ९ सय ३५ जनामा कोरोना पोजेटिभ आएको छ ।

हालसम्म कोरोनाबाट १ सय ४९ जनाको मृत्यु भएको छ ।