बाग्मतीमा दैनिक दुई सयभन्दा बढी कोरोना संक्रमित थपिँदै, सातामा १६७५ जनालाई संक्रमण पुष्टि

काठमाडौं- बाग्मती प्रदेशमा दैनिक दुई सयभन्दा बढी कोरोना भाइरस (कोभिड-१९) संक्रमित थपिने गरेका छन्।

प्रदेशको सामाजिक विकास मन्त्रालयका अनुसार गत बुधबारयता दैनिक दुई सय जनाभन्दा बढीलाई कोरोना संक्रमण पुष्टि भएको छ। गत बुधबार २०९, बिहीबार २०९, शुक्रबार २५०, शनिबार २८७ र आज (आइतबार) २२१ जनामा कोरोना संक्रमण देखिएको मन्त्रालयले जनाएको छ। त्यसअघि गत मंगलबार ३०४ र सोमबार १९५ जनामा कोरोना पुष्टि भएको थियो।

मन्त्रालयका अनुसार पछिल्लो सातामा प्रदेशभर एक हजार ६७५ जनालाई कोरोना संक्रमण देखिएको छ। उक्त अवधिमा काठमाडौंमा मात्रै एक हजार १३ जना संक्रमित थपिएका छन्।

प्रदेशमा अहिलेसम्म कूल संक्रमितको संख्या चार हजार ५४२ पुगेको छ। तीमध्ये ७६६ मात्रै उपचारपछि निको भएका छन् भने तीन हजार ७४५ जना अझै उपचार गराइरहेका छन्।

प्रदेशभर ३१ जना कोरोना संक्रमितको मृत्यु भइसकेको मन्त्रालयले जनाएको छ।