रुकुम पश्चिम सदरमुकामसहित तीन वटा स्थानीय तहमा भोलिदेखि निषेधाज्ञा

सुर्खेत- कोरोना भाइरस संक्रमित बढेपछि रुकुम पश्चिमका तीन वटा स्थानीय तहमा भोलिदेखि निषेधाज्ञा जारी गरिएको छ। सदरमुकाम खलंगासहित मुसिकोट नगरपालिका, सानीभेरी गाउँपालिका र आठविस नगरपालिकाको वडा नम्बर १०, ११ र १२ मा निषेधाज्ञा जारी गरिएको हो।

जिल्ला प्रशासन कार्यालय, रुकुम पश्चिमले भोलि (सोमबार) बिहान ४ बजेदेखि १४ गते राति १२ बजेसम्मका लागि निषेधाज्ञा जारी गरिएको जनाएको छ।

निषेधाज्ञा अवधिभर खाद्य, फलफूल र तरकारी पसल भने बिहान ६ देखि ९ बजेसम्म खोल्न पाइने प्रमुख जिल्ला अधिकारी उपेन्द्रराज पौडेलले जानकारी दिए।

मुसिकोट नगरपालिकामा आज (आइतबार) १८ जना कोरोना संक्रमित थपिएको रुकुम पश्चिमका कोरोना फोकल पर्सन ईश्वर रावलले जानकारी दिए। चौरजहारी पीसीआर प्रयोगशालामा परीक्षण गर्दा मुसिकोट नगरपालिकाका १५ जना र सानीभेरी गाउँपालिकाका तीन जनामा संक्रमण पुष्टि भएको हो।