काठमाडौं- ललितपुरको पाटन अस्पतालमा आज एकै दिन दुई जना कोरोना संक्रमितको मृत्यु भएको छ ।
दोलखाकी ३० वर्षीया महिला र सर्लाहीका ४६ वर्षीय पुरुषको उपचारका क्रममा आज बिहान मृत्यु भएको अस्पतालले जनाएको छ ।
दोलखाकी कोरोना संक्रमित महिला भदौ २ गते अस्पताल भर्ना भएकी थिइन् भने सर्लाहीका पुरुष साउन ३१ गते भर्ना भएका थिए । दुवैको आइसीयूमा उपचार हुँदै आएको थियो ।
योसँगै पछिल्लो १२ घण्टामा कोरोनाबाट ६ जनाको मृत्यु भएको छ । यसअघि सोमबार राति मोरङको विराटनगर, पर्साको वीरगन्ज, चितवनको भरतपुर र रुपन्देहीको बुटवलमा एक/एक जनाको मृत्यु भएको थियो ।
थप ६ जनाको मृत्यु भएसँगै देशभर कोरोनाबाट ज्यान गुमाउनेको संख्या १३२ पुगेको छ ।
प्रकाशित: Aug 21, 2020| 11:03 शुक्रबार, भदौ ५, २०७७
