नेकपा कार्यदलको बैठक बालुवाटारमा जारी

काठमाडौं– सत्तारुढ दल नेकपाभित्र देखिएको विवाद समाधान गर्न गठिन कार्यदलको बैठक प्रधानमन्त्री निवास बालुवाटारमा बसिरहेको छ।

सचिवालय र स्थायी कमिटी बैठक बस्ने भवनमा कार्यदलको बैठक अहिले बसिरहेको प्रधानमन्त्रीका सञ्चार विज्ञ रामशरण बजगाईँले जानकारी दिए।

पार्टीभित्रको विवाद समाधानको सुझाव दिन नेकपाले गत शुक्रबार महासचिव विष्णु पौडेलको संयोजकत्वमा ६ सदस्यीय कार्यदल गठन गरेको थियो। गत बिहीबार र शुक्रबार दुई अध्यक्षबीचको छलफलपछि कार्यदल गठन गरिएको थियो।

सचिवालयका अन्य नेताहरुले कार्यदलको वैधानिकताका विषयमा आपत्ति जनाएपछि सोमबार बसेको सचिवालयको बैठकले कार्यदललाई अनुमोदन गरेको थियो। कार्यदल गठन भएयता विभिन्न चरणमा बैठक बसेर पार्टीभित्र देखिएको विवाद समाधानको सुत्र खोज्ने प्रयास भइरहेको छ।

कार्यदलले प्रतिवेदन दुवै अध्यक्षलाई बुझाएपछि त्यसलाई पार्टी कमिटीको बैठकमा पेश गरिने छ। स्रोतका अनुसार कार्यदलले छिट्टै प्रतिवेदन बुझाउने तयारी गरेको छ।